Hau Pittu Hau – Euskaldunon konpartsa

“Eman euskara elkarri” lelopean,  martxoaren 14an abiatuko da aurtengo Korrika, hemezortzigarrena, Andoaineko Martin Ugalde kultur parketik, 16:30ean; hamaika egunez Euskal Herria zeharkatu ondoren hilaren 24an Baionan amaitzeko. Bilbora martxoaren 21ean helduko da, 17:30 aldera. Erandiotik igaro ostean San Inaziora helduko da eta 21:30 pasatxo Abusutik irtengo da, Etxebarrira. Tartean lau ordu emango ditu auzoetatik gora eta behera.

Euskal Herrian Euskaraz herri mugimenduko eragile euskaltzaleak heldu den apirilaren 13an Agoitzen (Nafarroa Garaia) egingo du Euskaraz Bizi Eguna (EBE).

Euskaraz Bizi Eguneko egitarau zabala da auzolanaren erakusgarri. Goizean goiz dianak egingo dira herritik zehar. 10:30ean, baina, izango da egunari hasiera emateko txupinazoa. Goiz osoan zehar buruhandiak, gaiteroak, trikitilariak, Abesbatza, Burrunba, Dantzariak, txistulariak eta txaranga ibiliko dira herritik zehar giroa alaitzen. Erraldoien Topaketa ere izango da goizean zehar. Artisauen eta euskalgintzaren azoka, erakusketa (kultur etxean) talogileak eta Herri Kirol erakustaldia (12:00etan) ere izango dira presente Agoizko kaleetan.

Haurren txokoa ezin aipatzeke utzi. 11:00etatik 14:00etara bitartean puzgarriak eta eskulan tailer ezberdinak egongo dira txikientzat, eta, 16:30etan Txan Magoaren ikuskizunaz gozatzen ahal izango dute Kultur etxean.

Eguerdian ehunka lagunentzako bazkari herrikoia eta ondoko kantaldi herrikoia izango dira protagonista nagusiak.

Ondoren, 17:00etan dantzaldia hasiko da Tximeleta taldearen eskutik. Ordubetez ariko dira Tximeletakoak, 18:00etan, “Ez zaitez espaloitik jaitsi. Euskaraz bizi!” lelopean eta musika eta kolore artean egingo baitu bidea euskaltzale andana bilduko dituen kalejira aldarrikatzaileak. Bukaeran, ekitaldia izango da eta ondoren Tximeletakoek dantzaldiarekin jarraituko dute 21:00ak bitartean.

21:30ean hasiko dira kontzertuak. Kezkak eta Leihotikan taldeek jarriko dituzte dantzan euskaltzaleak, eta, hauen ostean, DJ Jotatxoren saioarekin jarraituko dute dantzan goizalderaino.

Argazkian, EHEk deituta, milaka lagunek parte hartu zuten 2012ko martxoaren 17an Donostian ospatutako Euskaraz Bizi Egunean / © Euskal Herrian Euskaraz.

Badator beste behin ere euskaldun eta euskaltzaleok irrikaz espero genuen Korrika, aurten, hamazortzigarrenez. “Eman euskara elkarri” lelopean egingo du Andoaingo Martin Ugalde Kultur Parketik abiatu eta Baiona helmuga izango duen bidea, eta milaka, hamarnaka mila, auskalo zenbat izango diren, aurten ere, euskaraz bizitzearen aldeko aldarria jantzita errepidera jauzi egin eta euskararen normalizazioari erritmoa markatzera aterako diren herritar, euskaldun, euskaltzaleak. Zita garrantzitsua da Korrika euskaldunontzat. Euskaraz bizitzearen aldeko herri gogoa piztu eta artikulatu, indarrak bildu, asmoak indarberritu eta euskaraz bizi nahi duen herriaren erakusle baita hainbeste urtetan hainbeste kilometro egin eta hainbeste jende bildu duen Korrika. Hitzordu hau iristear den aldioro egiten dugun lez, Euskal Herrian Euskaraz (EHE) herri mugimenduko eragile euskaltzaletik deialdia egin nahi dizuegu euskararen alde egotetik harago euskararen alde egitera pasatzeko prest dagoen herri euskalduna osatzen duzuen guztiei, euskaldun izatearen harrotasuna erakutsiz, espaloitik ez jaisteko konpromisoa norbere eginez, Korrikan parte hartuz Euskal Herri euskaldunaren aldeko bidean urratsak eman ditzagun.

EHEtik planteamendu berezia egin dugu Korrika18-ri begira. Batetik, Korrika16-an abiatu genuen barraskiloaren ekimena berreskuratu dugu. EHEren barraskiloak, hortaz, Korrika18ren lehen kilometrotik egingo du bide, hainbat herritatik pasatuz (eta lasterbideren bat edo beste baliatuz), Baionaraino. Bestalde, azken urteotako ildoari jarraituz, 5 eurotan salduko ditugun ‘Euskalduna naiz eta harro nago!’ lelodun kamiseten hedapena egingo dugu korrikalariek euskaldun izatearen harrotasunez jantzita korri egin dezaten. Azkenik, betiko ohiturari jarraiki, euskaraz bizitzearen aldeko aldarriz josiko dugu Korrika18-ren ibilbidea.

Sasi guztien gainetik, espaloitik jaitsi gabe, garenaren harrotasuna erakutsiz egunez egun eta urratsez urrats bidea egin eta aldaketak eragin ditzakegulako, eman euskara elkarri eta goazen Korrika Euskal Herri euskaldunerantz!

Honekin batera, Korrika bukatu eta gutxira, apirilaren 13an Agoitzen ospatuko dugun Euskaraz Bizi Egunean arestian aipatu arrazoi berberengatik parte hartzeko deia ere luzatu nahi dizuegu hemendik.

Andoainen, 2013ko martxoaren 13an.
Euskal Herrian Euskaraz (EHE)

“Eman euskara elkarri” lelopean,  bihar abiatuko da aurtengo Korrika, hemezortzigarrena, Andoaineko Martin Ugalde kultur parketik, 16:30ean; hamaika egunez Euskal Herria zeharkatu ondoren hilaren 24an Baionan amaitzeko. Bilbora martxoaren 21ean helduko da, 17:30 aldera. Erandiotik igaro ostean San Inaziora helduko da eta 21:30 pasatxo Abusutik irtengo da, Etxebarrira. Tartean lau ordu emango ditu auzoetatik gora eta behera.

Argazkian, besteak beste, Uribarrin Korrikaren aldeko FLASH MOBa grabatu zuten martxoaren 1ean.

EMAN EUSKARA ELKARRI da Korrika 18k aukeratu duen leloa. Euskara da, izatez, euskal herritarrok ELKARREKIN bizitzeko aukeratu nahi dugun hizkuntza. ELKARRI hitz egiteko hizkuntza. ELKAR entzuteko eta ulertzeko.

Bilboko euskalgintzak bat egiten du Korrikaren leloak adierazten duen mezuarekin. ELKAR entzutea eta ulertzea izanik helburua, ELKAR bizitzarako erabili beharreko hizkuntza euskara da eta Bilbon ere horrela behar du. Horregatik da garrantzitsua dakienak ikasi nahi duenari irakastea, ulertzen duenak hitz egiten duenari erabiltzeko aukera ematea, agintariek, herritar orori ikasteko bideak erraztea… azken batean, ELKARRI ematea euskara bakoitzak duen egoeratik abiatuta.

Euskara euskal herritarron ELKAR bizitzarako gakoa izanik, ELKARREKIN bizitzeko, ELKARRI hitz egiteko, ELKAR entzuteko, eta ELKAR ulertzeko tresna izanik, euskal herritarrok euskal kultura ezagutzea eta euskara jakitea beharrezkoa da.

Horregatik, KORRIKA 18k euskalduntzen eta alfabetatzen ari diren milaka eta milaka pertsonak omendu nahi ditu. Bilboko Euskalgintzak ere, bereziki, Bilbon euskaldun izateko ahaleginean euskara ikasten eta praktikatzen ari diren guztiak omendu nahi ditu, edozein izanda ere euren egoera linguistikoa edo euren jatorria.

Aurreko Korriketan bezala, botere publikoei dei egin nahi diegu, eta Bilboko Udalari espresuki, euskara babesteko eta bultzatzeko neurriak ezar ditzaten. Bilboko euskalgintzako taldeok, omendu ez ezik, euskara ikasleen lekukotza ozen plazaratu gura dugu, ez delako zilegi bertako hizkuntza ikasteko ikasleek ordaindu behar dutena ordaindu behar izatea. Doakotasuna aldarrikatzen dugu, euskal herritar guztien eskubidea delako euskaldun izatea

Beraz, Bilboko euskalgintzako kide guztiei, eta beren beregi, Bilboko euskara ikasle guztiei, dei egiten diegu datorren martxoaren 21ean Bilboko Euskalgintzako kilometroan parte har dezaten.

Artez, Asapala Kultur elkartea, Bai & By, Berbaizu Euskara Elkartea, Berton Aldizkaria Bilbo Hiria irratia, Bilbo Zaharra Euskaltegia, Bilboko AEK, Bilboko Berbalagunak, Deustuko Unibertsitateko Irakaslego Eskola, Euskal Herrian Euskaraz, Euskarri Euskara taldea, Gabriel Aresti Euskaltegia, GITE-IPES, Hamaika TB, Hau Pittu Hau, Hordago Abante, Ibaizabal Mendebalde Kultur elkartea, Juan Mateo Zabala Euskaltegia, Labayru euskaltegia, Lizardi Mintza Taldea, Mikelats Euskaltegia, Mondragon Lingua, Palanka Euskara taldea Prest! Aldizkaria, Tanttaka Uribarri Euskaltegia, Zenbat Gara, Zorrotzako Euskal Txokoa

“Behar zaituztegu oraindik” esan du Joan Mari Torrealdaik Martin Ugalde Kultur Parkean “Euskaldunon Egunkaria”-ren itxieraren 10. urteurren egunean. Andoainen egindako ekitaldian Egunkariaren zauriari odola dariola oraindik esan du eta hori itxi beharra aldarrikatu. Bertan izan dira “Egunkaria auziko” auzipetuak, langile ohiak, baita hainbat arlotako eragile eta ordezkariak ere, baita Kontseiluko idazkari nagusi Paul Bilbao ere. Juan Mari Torrealdaik gogorarazi du oraindik auzi ekonomikoa zabalik dagoela, eta guztion babesa eskatu du, auzi ekonomikoa absoluzioarekin itxi arte. Zortzi auzipetu daude Euskaldunon Egunkariko auzi ekonomikoan: Joan Mari Torrealdai, Iñaki Uria, Txema Auzmendi, Joxe Mari Sors, Ainhoa Albisu, Mikel Sorozabal, Begoña Zubelzu eta Fernando Furundarena. “Berria” kazetak webgune berezia egin du Euskaldunon Egunkaria auziaz. Horretaz gain, #Egunkaria10Urte etiketarekin ari dira itxiera gogoratzen Twitterren.

Gaur bete dira 10 urte, Espainiako Auzitegi Nazionalaren aginduz, Guardia Zibilak “Euskaldunon Egunkaria” itxi zuenetik. Xabier Oleaga Erandioko semea, Martxelo Otamendi, Iñaki Uria, Txema Auzmendi eta Joan Mari Torrealdai epaitu zituen Auzitegi Nazionalak, 2009ko abenduan hasi eta 2010eko otsailaren 1ean amaituta. Fiskalak nahiz defentsak absoluzioa eskatu zuten auzipetuentzat, “Egunkaria”k ETArekin loturarik izan ez zuela-eta, eta Dignidad y Justicia eta AVT elkarteek, berriz, 12 eta 14 urte arteko espetxe zigorrak. Bada, 2010eko apirilean emandako ebazpenean Auzitegi Nazionalak absolbitu egin zituen: hala ere, auzi ekonomikoa zabalik dago oraindik. Baina, hori ez da Auzitegi Nazionalean epaituko, Gipuzkoan baizik. Jose Maria Vazquez Honrubia epaileak gaur kaleratutako autoan “Egun Karia” (sic) itxi zuteneko auzi nagusian absoluzio epaian “delitu terroristaren” zantzurik agertu ez zenez, auzi ekonomikoa epaitzeko eskuduntzarik ez zuela deliberatu zuen. Hori dela eta, 2003tik izan zuen espedientea Donostiako Epaitegi Dekanotzara eskualdatu zuen, Gipuzkoan dagokion epaitegiari banatu ziezaioten. Bere aldetik, Dignidad y Justicia herri akusazio bakarra Egunkariaren auzi ekonomikotik kanpo utzi zuen behin betiko 2011ko abenduan Donostiako Auzitegiak. Epaitegiak adierazi zuen talde ultraeskuindarrak ez duela zilegitasunik Egunkariaren auzi ekonomikoan herri-akusazio izateko, bertan ez delako terrorismo deliturik epaitzen.

Iturria: Bilboko Branka

Korrikaren 18. edizioa Andoaindik abiatuko da martxoaren 14an “Eman euskara elkarri” lelopean, eta hamar egun geroago Baionara helduko da. Tartean Euskal Herri osoko ehunka herri eta txoko eta 2.000 kilometro baino gehiago egingo ditu euskararen aldeko ekimenak.

Bilbora martxoaren 21ean helduko da, 17:30 aldera. Erandiotik igaro ostean San Inaziora helduko da eta 21:30 pasatxo Abusutik irtengo da, Etxebarrira. Tartean lau ordu emango ditu auzoetatik gora eta behera.

Korrikako antolakuntzak aplikazio bat prestatu du lasterketak uneoro herri bakoitzera heltzeko falta duen distantzia eta denbora jakin ahal izateko.

Euskara ikasteko helburuarekin astean behin biltzen diren berbalagunek hitzordu berezia izango dute otsailaren 13an, asteazkena, izan ere, leku itxi batean bildu baino, “mintza-poteoa” egingo baitute Plaza Barritik hasita, Bilboko Branka agerkari digitalak zabaldu duenez.

Zazpikaletarrok taldeak mintzalagunei kalera ateratzeko gonbitea luzatu die elkar ezagutzeko asmoz. Orain arte leku itxietan zein talde txikietan batzen ziren eta kalera atera eta “mintza-poteoa” egitearen ideia garatu dute “euskara gehiago egingo” dutelakoan.

Beraz, ekimenaren helburua euskaraz egitea izango da baina lagun arteko giroan. Gauzak horrela, otsailaren 13an, 19:00etan Plaza Barrian batuko dira Euskaltzaindiaren egoitzaren aurrean, eta Arkaitz Estiballes Bizkaiko Bertso Finaleko irabazleak egingo ditu mintzalagunen arteko aurkezpenak eta bere esku egongo da euren arteko elkarrizketak bultzatzea.

Ostegunean, otsailak 7, egingo dute Korrika Batzordearen hurrengo bilera. Hitzordua 18:30ean jarri dute Artxandape ikastolan.

Uribarriko lagunek flashmob-a grabatuko dute Korrikaren 18. edizioari babesa emateko eta auzoan ere euskaraz bizi nahi dutela argi uzteko. Datozen egunetan ekimenean erabiliko duten koreografia eskuratzeko aukera egongo da sarean eta horrela, etxetik dantza-pausoak prestatu ahalko dituzte ekimenean parte hartuko duten lagunek.

Dagoeneko Korrika 18 prestatzen hasi dira Uribarrin eta deialdiari oihartzun handiagoa emateko asmoz, flashmob-a grabatuko dutela iragarri dute. Grabaketaren hitzordua martxoaren 1ean izango da, ostirala, eta hiritar zein auzokideei bertara gerturatzeko gonbitea luzatu diete.

Auzoko lagunek jakitera eman dutenez, koreografiarako pausoak laister sarean eskuragarri egongo dira dantza prestatzen joateko.

Bestalde, ostegunean, otsailak 7, egingo dute Korrika Batzordearen hurrengo bilera. Hitzordua 18:30ean jarri dute Artxandape ikastolan.