Trikiziok Hau Pittu Hau musikatu du!!

Gure konpartsaren 30. urteurrena ospatzeko, abesti hau sortu dute; jai herrikoiak, euskara, Aste Nagusia, euskaldunak… ardatz

UEUrentzat izango da aurtengo Euskara Saria

Astelehenean, abuztuak 19, banatuko dugu Euskara Saria, 16:30ean, Euskalgunean.

2013ko Euskara Saria UEUrentzat izatea ez da arraroa. Luze daramate Euskararen aldeko lanetan: euskaraz funtzionatzen, euskaldunen topaleku estrategikoa izaten, euskaraz egindako ondarea sortzen eta biltzen eta euskarari itxitako ateak zabaltzen. Euskara bera da euren arrazoi nagusietako bat.

UEUk Euskal Herri osoa izan du hasieratik gaurdaino bere komunitate eta lurralde naturala: muga administratiboak gaindituz eta benetako Euskal Unibertsitatea eraikiz.

Euskal Herria euskalduntzearen lan horretan Unibertsitate euskalduna eraikitzen jardun du 1973tik. Momentuan gizartean dagoen irrika eta beharrak aztertuz, egokituz eta, azkenik, lekua eskainiz. Herritik sortutako beharretatik abiatuz herria bera izan zen horiei forma ematen hasi zena. Gaur egun, bazkideak oinarri dira eta ezagupen ezberdinetako 27 Sailetan banatuta daude eta horrek mota ezberdinetako proiektuak etengabe sortzea dakar.

Lana edo eraikuntza diogunean uzta oparo eta aberatsa helarazi digutelako diogu: denon eskura dagoen azpiegitura bibliografikoak eta arlo teknikoan euskarazko terminologian egindako lanak; hau da, Unibertsitate mailan euskaraz ikasteko eta ikertzeko lekua egokitu dute.

Horrez gain, gai berritzaileak izan dira landu eta lantzen dituztenak, horiei forma emanez eta gizarteratuz: ikastaroetan , mintegietan, liburu eta aldizkarietan… Horietako asko interneten aurki ditzakegu, herritik herriarentzat sortuak, UEUk izaera sozial eta onura publikoarena baitu. Sortu edota bildutako guztia jendartearen eskura modu erraz eta erosoan eskaintzen dute.

Hau Pittu Hautik lan guzti hau euskaraz egiteak duen balioa azpimarratu gura dugu, ausardia eta kemen paregabea erakutsi baitute oztopoak gainditzeko orduan. Euskal Unibertsitatea posible dela ikusarazi digute adibide ezberdinak eskainiz. Hori gutxi balitz, hurbilak izan eta, aldi berean, berritzailea izan daitekeela ere agertu dute kalitate handiko emaitzak emanez. Beraz, gure ustez, Euskalgintzaren barruan, oso harro egoteko moduko proiektua da.

Horregatik guztiagatik, saritu nahiko genuke aurten UEU, egindako ahalegin, lan eta ekarpen guztiagatik.

Jone Artolaren, behin-behineko suspentsioaren aurrean, hurrengoa adierazi nahi dugu

Argazkian, Jone Artola eta Iraia Iturregui aurtengo txupinera eta pregoilaria.

Azken egunotan errepikatu dugun bezala, ez dugu planteatzen Jone Artola ez den pertsona bat 2013ko Aste Nagusiko txupinera izan daitekeenik, konpartsa guztiak eta haien pluraltasuna ordezkatzen dituen kargua. Komunikabideetan, Jai Batzorde Mistoan eta epaitegian aurkeztutako alegazioetan behin eta berriz errepikatu dugunez, ez dago inolako benetako arrazoirik Jone txupinera izan ez dadin.

Epailearen ebazpenari dagokionez, harrigarria da aurkeztutako alegazioak onartu ostean, behin-behineko suspentsioa mantentzea, bereziki orain dela oso gutxi bi konpartsari ezarritako zigorrak behin-behinean etetea onartu ez zenean, eta ondoren legearen kontrakoak eta baliogabeak deklaratu zirenean, dagoeneko kaltea eginda zegoenean.

Ez da onargarria Aste Nagusiarekin zerikusirik ez duten interesengatik bilbotar guztiok Aste Nagusiari eta bere ikonoei egindako eraso honen egoera nazkagarria jasan behar izatea.

Aste Nagusiaren 3 ikonoak (Marijaia, txupinera eta pregoilaria) bere hasierako momentua konpartitu ezin dezaketen egoera batean, ez dira ematen txupinaren ekitaldia normaltasunez egiteko baldintzak, izan ere kasu honetan hiruki honen funtsezko elementu bat faltako litzateke, hain zuzen Aste Nagusiari hasiera ematen dion txupina botatzen duena.

Bilboko Konpartsontzat tamalgarria da, beste behin ere, gure indar eta denbora guztia benetan gogoko dugunean ez ematea, jaia sortu eta disfrutatzea, gurekin zerikusirik ez duten gai hauekin ibili beharrean. Hala ere, gure gogo guztia jarriko dugu jaietako 3 ikonoak merezi duten mailan egoteko, horrela guztiok hasiera hasieratik posible den Aste Nagusirik onena bizi ahal izateko, nahiz eta gustatuko litzaiguken bezalakoa ez izan aguafiesten erruz.

Erabaki judiziala edozein izanik ere, Jone Artola 2013ko Aste Nagusiko txupinera dela adierazi dute Bilboko Konpartsek

Jone Artolaren txupinera izendapena bertan behera utzi du Bilboko epaitegi batek. Carlos Urkijo Espainiako Gobernuaren delegatuak egin zuen eskaera, eta Bilboko epaileak onartu egin du. Hala ere, eabaki judizialaren erabakia edozein izanik ere, eta nahiz eta Jone Artola txupinera izendapenetik kargugabetu, Bilboko Konpartsek “2013ko Aste Nagusiko txupinera” Jone Artola dela adierazi dute. Konpartsen bozeramaile Itziar Villafañezek, datorren ostiralean berriz biltzekotan gelditu den bilkuran izan ostean, oraindik epailearen erabakia zein den ez zekitela adierazi dio Europa Pressi. Bilboko Konpartsen bozeramaileak uste du “ez dagoela arrazoirik” Artola txupinera izendapenetik kargugabetzeko, eta beraz, “suspentzioa kendu” egin beharko litzakeela. “Argi daukaguna zera da, arrazoi horiek hor daudela eta erabaki judiziala edozein delarik ere Jone Artola dela 2013ko Aste Nagusiko txupinera” eman du aditzera.

Artola txupinera izendatzearen aurkako helegitea Espainiar Gobernuko EAEko ordezkari Carlos Urquijok aurkeztu zuen, erabakia “biktimenganako iraina” dela uste baitu. Artola Etxerateko kide, Txori Barroteko sortzaile eta ANVko hautagai izanda txupinera izendatzea biktimei burla egitea dela dio Urquijok.

Bilboko Konpartsen eta herritarren agerraldia Aste Nagusiari eta jaietako ikonoei babesa emateko

Argazkian, jende ugari batu zen atzo Arriaga plazan.

Bilboko Konpartsetatik eskerrak eman nahi dizkizuegu gaur Arriagara hurbildu zareten guztioi, baita etorri ezina adierazi arren, Aste Nagusiari eta jaietako ikonoei zuen babesa adierazteko ekitaldi honekin bat egiteagatik.

Gaurkoan mezu argi eta zuzena adierazi nahi dugu: utzi Aste Nagusia eta bere sinboloak berarekin eta berau definitzen duen jai eredu herritar eta parte-hartzailearekin zerikusirik ez duten interesekin erabiltzeari.

Berriro ere ikusi dugu tamalez Aste Nagusiaren hasiera zapuztu nahi izan dutela bere ezaugarririk maitatuenetakoa den txupinerari eraso eginez. Aurten Jone Artolari egokitu zaio ohore hori.

Bilboko Konpartsetatik gure babesa erakutsi nahi diegu errespetu guztia merezi duten txupinerari zein pregoilariari, Aste Nagusiaren sinbolo direnez gero.

Ikono hauetako bat erasotua den bakoitzean, Aste Nagusia bera eta Bilboko hiria bera, bertan parte hartzen eta disfrutatzen dugun herritar guztiok eta Aste Nagusia bera gara erasotuak.

Bilbotar guztiei dei egiten diegu, urte osoko lanaren eta errutinaren ostean merezitako jaiez goza dezaten, Aste Nagusiko ekitaldi guztietan normaltasunez esku hartuz. Hori da jaiaren aurka dagoen jende horri denok gozatzen jarraitzeko prest gaudela erakusteko modurik onena.

Euskalguneko egitaraua aurkeztu dugu

euskalgunea-prentsaurrekoa-2013

Argazkian, astelehenean egin genuen Euskalguneko egitaraua aurkezteko prentsaurrekoa.

Euskalgunean elkartu garen konpartsok (Abante, Eguzkizaleak, Hau Pittu Hau eta Txori Barrote) urte osoan zehar euskara eta euskal kulturaren alde lanean dihardugu. Bilbo euskaldun gehien bizi den Euskal Herriko udalerria izan arren, euskaldunok euskaraz bizitzeko zailtasunak ditugu. Eta gainera, euskarazko kultur eta aisialdi eskaintza eskasa da. Horregatik eta aldats gora bada ere, guk euskaraz bizi nahi dugu. Hori dela eta, aurtengo Aste Nagusian honako baloreetan oinarritutako egitaraua prestatu dugu:

• Euskalduntasuna.

• Parte hartzea eta hartu-emana.

• Euskal kultura plazaratzea.

Jarduerak eta giroa lagun, bederatzi egun magiko hauek gurekin ondo pasatzera gonbidatzen zaituztegu herritar guztiok. Ildo horretan, dei berezia egiten dizuegu euskara ikasten ahalegin handia egiten duzuen lagunoi, nagiak eta lotsak alde batera utz ditzazuen eta festan murgil zaitezten.

Zatozte Euskalgunera eta izan jai herrikoien lagun!

EUSKALGUNEKO EGITARAUA 2013

DOMEKA 18: ROCK & ROLL eguna

14:00 EMAROCK argazki erakusketa egun osoan zehar

15:00 Txori Barrote/Kaskagorri bazkaria

16:00 Txori Barrote/Kaskagorri bazkalosteko jolasak

19:00 Txori Barrote konpartsa. Elkartasun Keinuen Orduaren Aurkezpena

21:30 EMAROCK dokumentalaren emanaldia

23:00 EMAROCK gaua: ENDEMAÑO + SIROKA

01:30 DJ MAI ANTISOZIAL

ASTELEHENA 19: EUSKALGUNE eguna

12:30 Eguzkizaleak konpartsa. Txosnaren dekorazio interaktiboa: Nola eratu ortu bertikal bat?

13:00 AINTZINAKO JOLASAK

14:00Euskalguneko BAZKARIA

16:30 Hau Pittu Hau konpartsa. Euskara saria

17:00 Euskalguneko konpartsen arteko GINKANA MISTOA

23:00 Txori Barrote konpartsa. Elkartasun Keinuen Ordua

00:00 Konpartsen arteko KARAOKE GAUA

ASTEARTEA 20: DANTZA eguna

13:00 DANTZA PLAZA eta Agurra ikasteko tailerra

18:00 DANTZA ZINGAROEN TAILERRA

19:30 Txori Barrote konpartsa. Triki Pegada Kalejira FOLK & FIRE taldearekin

20:00 DANTZA LATINOEN TAILERRA

20:30 Eguzkizaleak konpartsa. RALLY POTEOA Eguzkizaleak txosnatik hasita

23:00 Txori Barrote konpartsa. Elkartasun Keinuen Ordua

00:00 RUNBA GAUA: 4 HARE ALE + DANTZARIAK

01:30 DJ K-BILLY (BOPPER DJ’s)

ASTEAZKENA 21: LURRA eguna

11:00 Eguzkizaleak konpartsa.LURRA EGUNAri hasiera emateko ongi etorria

11:00-14:00 Eguzkizaleak konpartsa. NEKAZARITZA ETA ARTISAUTZA AZOKA, euskal baserritar (EHNEk kudeatuta) eta artisauen eskutik

12:00 Eguzkizaleak konpartsa. EHNEk antolatutako MARMELADA TAILERRA

12:30 Eguzkizaleak konpartsa. LOREZAINTZA TAILERRA

* Goiz osoan zehar TRIKI-MUSIKARIAK

14:30 Eguzkizaleak konpartsa. LURRA BAZKARIA

18:00 HARRI-ZULATZAILEAK

20:30 KALEJIRA MASKARRADAREKIN

23:00 Txori Barrote konpartsa. Elkartasun Keinuen Ordua

00:00 KONTZERTUAK: MANDOILEK + GARILAK 26

OSTEGUNA 22: ERAIKI eguna

12:30 Eguzkizaleak konpartsa. LOREZAINTZA TAILERRA

13:00 Familientzat JAIEN DEKORAZIO ESKULAN TAILERRA

13:30 BERTSO HASTAPEN JOLASAK

15:00 Hau Pittu Hau konpartsa. ¡Eraiki Euskaldunon konpartsa! bazkaria

17:00 Hau Pittu Hau konpartsa. Garagardo dastaketa lehiaketa

20:00 Txori Barrote konpartsa. Elkartasun Keinuen Poteoa ELEKTROTXARANGArekin

22:00 Hau Pittu Hau konpartsa. “Izoztu” ekintza masiboa

23:00 Txori Barrote konpartsa. Elkartasun Keinuen Ordua

00:00 RAP-REGGAE GAUA: ASKAPEN SOUND SISTEMA

02:00 DODOSOUND & ROCKO TENOR SAX

OSTIRALA 23: ELKARTASUN eguna

14:30 BAZKARIA

20:00 Txori Barrote konpartsa. Elkartasun Keinuen Ordua.

23:00 GAU ELEKTRONIKOA: MATXURA

01:00 DJ OKERREKO

LARUNBATA 24: KONPARTSEN eguna

12:30 Eguzkizaleak konpartsa. Hurbildu Eguzkizaleak txosnara eta Aste Nagusiko oroigarria bizia eraman ezazu

20:30 KALEJIRA FABE DE FUKA taldearekin Arriaga enparantzatik

23:00 Txori Barrote konpartsa. Elkartasun Keinuen Ordua

00:00 DR BALTZ

IGANDEA 25: XIRRRIEN eguna

13:00 ARGAZKI EROTIKOEN ERAKUSKETA

13:30 MASAJE TAILERRA

17:00 SORMEN TAILERRA: EROTISMOA INDAR SORTZAILEA

19:00 SEXUALITATE TAILERRA: PLAZERREZ NEGOZIATU, NEGOZIATU PLAZERRA

HAINBAT MUSIKARIREN FITXAK

EMAROCK

“EMAROCK” proiektu bat da, euskal herrian batez ere, musikan aritzen diren emakumei protagonismoa eta espazio bat ematea du helburutzat. Hala nola emakumeak bultzatzea esparru hau jorratzera, musikarena hain zuzen eta eszenatoki baten gainean bada askoz hobe. Emakumeen presentzia geroz eta handiagoa bada ere, oraindik hutsune asko daude, hori aldatzea espero da.

Euskal herrian emakumez soilik osatutako zenbat musika talde ezagutzen dituzu? Eta zenbat emakume bakarlari edo musika taldeetan? eta euskeraz aritzen direnak? Emakume baterijolerik ezagutzen ahal duzu? Zergaitik musika eskolak daude neskez beteta eta gero eszenatokietan ez da kopuru hori mantentzen?

Aurreko erantzunetan flojo bazabiltzate, ordun, duda izpirik gabe EMAROCK “Iragana, oraina eta geroa” erakusketa ikustera gerturatu behar zarete eta gure proiektua ezagutu. eta holan ez bada gerturatu eta disfrutatu!

EMAROCK “Iragana, oraina eta geroa” erakusketa martxan da 2012ko maiatzetik, bertan euskal herriko hainbat emakume musikarien argazkiak ikusgai daude, argazki guztiak zuzeneko kontzertukoak dira, 70 emakume musikari baino gehiago bildu ditugu bertan. Argazkiei laguntzeko, diskoetako portadak, egunkarietako artikuluak eta emakumeak egondako taldeen zerrenda ikusgai dago baita.

Erakusketan baita izen bereko dokumental baten bidez emakume musikari hauen esperientzi eta iritziak jasotzen dira. Zergaitik daude horren emakume gutxi musika munduan? Dokumentalean parte hartu dutenak: Zaloa Urain (Kokein), Eneritz eta Edurtzeta (Ene bada), Ines Osinaga (Gose), Kristina Aranzabe eta Leire Berasaluze (Lain), Aiora Renteria (Zea mays), Zuriñe Hidalgo (Hesian), Silvia Guilèn (Kerasy), Maite Arroitajauregi (Mursego), Nerea Sanchez (Giza proiektua), Miren Narbaiza (Napoka Iria), Idoia Arraiza eta Jule Goñi (Gaur Ez), Natalia Garmendia (Humus), Amaia Zubiria, Maixa ta Ixiar, Naroa Gaintza (Amaiur), Onintze Garcia (Seiren).

ENDEMAÑO

Taldekideak: Ane (Bateria), Mayi (Kitarra), Aitane (Baxua).

Eztekogu berbarik geure musikea etiketetako. Entzuteko nahikoa bazara, ulertuko duzu zarata barrenera doala, Endemañok Meñakan dekon lekuaren bide. 2012ko Martxoan batu ziren bere hiru ardatzak(Ane, Mayi eta Aitane). Eurentzako ezezagunak ziran instrumentuek hartute (Baterie, Kitarra eta Bajue) Beharrak eta biharrak deitute.

SIROKA

Siroka musika taldea 2009ko udan sortu zen. Ezagunak ziren lagun batzuk abesti bi sortzeko intentzioarekin batu ziren eta egindakoak sortarazitako haize boladek Siroka musika taldearen jaiotza ekarri zuen. Taldekideak garai horretan Maria (ahotsa), Gaizka (baxua), Gorka (bateria) eta Ekaitz (gitarra) ziren eta denak bestelako musika taldeetatik eratorriak dira, besteak beste, Apurka, Izate Faltsua, Feos Pero Majos edota Kloratita hurrenez hurren. Aurkezpen moduan “Haize berriak” diskoa kaleratzen dute urte horretan. Handik gutxira Gaizkak taldea uzten du eta Pepok (All Nighters Club, Keats) hartzen du bere lekua, bira luze bati aurre eginez.

2011eko maiatzean “Karosi” diska liburu ikusgarria kaleratzen dute. 9 lehentasun, 9 kantu eta 9 ipuin laburrez osatua. Urte ta erdiz plazaz plaza bira luzea burutzen dute 2012ko abuzturarte.

Garai horretan Ekaitzek taldea uzten du eta bere partez Iñigo Pagaza (Izargi) sartzen da taldera eta hirugarren diskoa izango dena prestatzen hasten dira.

Sirokan rock-a da oinarria. Hitz gutxitan, ahots melodikoa, erritmo dantzagarriak eta sinpletasuna. Euskal Herriko errealitatean kokatuak, bidegabekerien salaketak eta inposatutako sistemaren aldaketarako grinak gidatzen dute taldekideen ideologia. Gaur egun, zuzeneko aurkezpen bira prestatzen dihardute buru-belarri.

4 HARE ALE

Bilboko laukote honek, 10 urtez elkarregaz daroate musika estilo ezberdinetatik edaten, hasierako rock gogor batetik, flamenco-jazz, swing, rumbara…

MANDOILEK

Talde berria eta gaztea baldin bada ere, musika munduan eskarmentu handikoak dira Mandoilek! taldea osatzen duten bost lagunak, eta kaleratu berri duten lehenengo lanak “Mandoilek!”, betiko erritmo dantzagarrietan oinarritutako nahaste erakargarria dakarkigu. Hainbat estilo jorratzen ditu Mandoilek! taldeak; hala nola, cumbia, runba eta reggaea, beti ere eskusoinu diatonikoa oinarritzat hartuz.

2011ko neguan, Ibon Olaguenagak (eskusoinua eta ahotsa) eta Asier Linaresek (bateria) jotzeari ekin zioten hotzak zekartzan mamuak uxatzeko. Horrela, ia ia konturatu gabe, beren melodia propioak sortu zituzten, errepertorio oso baterako ematen zutenak. Banda osatzeko musikariak bildu baino ez zuten egin behar. Lagun baten tabernak hartu zuen lehenengo emanaldia. Unai Mendibil (testuak eta ahotsak), Andoni Vera (gitarrak) eta David Ferreño (baxuak) dira Mandoilek! taldeko gainerako musikariak.

GARILAK 26

Garilak 26 talde Bizkaitarra 2011ko abenduan hasi zen martxan. Eneko (alboka) eta Ander (trikitixa) kalean batera jotzen ezagutu eta proiektu berri honeri ekin zioten. Iker (E-Gene taldeko gitarra) Anderren lankide, batu zen ondoren eta beraren bitartez ezagutu genuen Ieltxu (bateria). Baxujole pare bat probatu ondoren, Unairekin (Skaramuzako baxujolea) topatu ginen eta taldean sartu zen. 2012ko abenduan lehen aldiz igo ziren eszenatokira, Astrabuduako Euskararen Egunean, oraindik abeslari barik. Ondoren Maria (ahotsa) batu zitzaiela taldera.

Euskal taldeen kantuak jotzen dituzte. Betiko taldekoenak, Exkixu, Jose Ripiau, Negu Gorriak, Lin Ton Taun, Kortatu eta baita dantzagarriak diren Tapia eta leturia, Alaitz eta Maider, Gozategi, Etzakit… Gaurko taldeenak ere jotzen dituzte, hala nola, Esne Beltza, Zea Mays, Gatibu, Vendetta, Ze esatek… Kantu guztiak euren erara moldatuz eta albokaren doinuaz apainduz. Garilak 26 talde gaztea da, eta zuzenenan alaitasuna eta ilusioa erakusten dute, beti ere euskaraz eta jai giro jatorra sortzea dutela helburu nagusitzat.

ASKAPEN SOUND SISTEMA

Askapen Sound Sistema, Gorka Suaia abeslari eta produktorearen proiektu berria da.

Euskal Herriko hip-hop eta reggae mailan ezaguna, 2004tik Gasteizko Kodigo Norteko taldekidea izan da, zenbait disko kaleratu dituenekin, eta azken urteetan sound system eta talde desberdinekin batera ere parte hartu du, 121 krew, Nebula selektah edo Revolutionary Brothers, besteak beste. 2012an aspalditik zeukan proiektu honi berriz ekin zion, reggae doinuetan murgilduz.

Proiektuaren oinarria sound system kontrainformatibo euskalduna osatzea da, babylonen aurkako mezuz betea, reggaeren soinu kontziente eta askatzaileaz baliatuz. Honetarako estilo desberdinak jorratzen ditu: hip-hop raggamuffina, dancehalla, rub-a-duba, reggae steperra, duba, junglea…gogoa askatzera eta dantzan jartzera gonbidatzen gaituzten soinuak.

Berezko soinua lortzeko, autoekoiztutako riddimek nagusitzen dute, diskoan zein zuzenekoan, “Mundua salgai” disko berrian adierazten duen bezala. Aldi berean, honek aukera ematen dio inprobizaziorako eta zuzeneko duba egiteko, bizitasun handia ematen diona zuzenean.

2013ko udaberriaren bukaeran bere lehen diskoa kaleratu du Taupaka elkartearekin, “Mundua salgai” izenekoa; herria, maitasuna,inperialismoa… edota bizi garen sistema honetaz diharduten hamaika kantarekin osatuta.

Askapenaren eguna heldu da…

DODOSOUND ETA ROCKO TENOR SAX

Hiphop-a, soul, funky, jungle eta bestelako erritmo beltzak jorratuko ditu #Dodosound-ek eta Rocko Tenor Sax-ek bere saxoarekin lagunduko dio.

MATXURA

Matxura, hainbat musikari ezagunek osaturiko taldea da. Mikel Kazalis (Estigia, Negu Gorriak, 2 Kate, Anestesia, Kuraia), Aitor Abio (Pi L.T.), Fernando Sapo (El Corazon Del Sapo, Kuraia, Estricalla) eta Txarly Diaz (Anestesia, Gutural) dira taldekideak. Azken bi urteak taldea osatzen eta abestiak egiten eta grabatzen pasatu ondoren, 2011kako ekainean argitaratu zuen taldeak lehen diskoa: Matxura (Bonberenea, 2011). Rock industriala edota punk-metal elektronikoa bezalako etiketak erabili dira taldea katalogatzeko. Azken batean, rock indartsua da, elektronikarekin nahastuta: ahots distortsionatuak, sintetizatore basatiak… Ministry, Atari Teenage Riot, Nine Inch Nails, Nailbomb Godflehs edota Front Line Assambly bezalako taldeen eragina nabarmendu izan dute aldizkari espezializatuek.

DJ OKERREKO

Posible al da musikaren bitartez mundua aldatzea? Ziur aski ez. Posibleago izanen da munduaren bitartez musika aldatzea. Hori bai gertatzen dela egunero. Okerreko duela urte dexente hasi zen musika jartzen. Ez bere burua DJ-tzat zuelako, baizik eta sosak diskatan xahutzen zituelako, eta beraz, musika lepo gordetzen zuelako etxean eta buru barnean. Gaztetxeak, tabernak, txosnak, jaiak… Horiek guztiak izan dira bere eremu noizbait.

Baina negozio gogorra da musika jartzailearena. Mugak jartzea zaila egiten da. Nun daude mugak gustoko dugunaren eta jendeak nahi duenaren artean? Nun daude mugak jendeak ezagutzen duen musika eta aukera bat merezi duten talde eta musikarien artean? Galdera guzti hauek erantzuten saiatuz, OkerrekO konturatzen doa DJ izatea oso kontu politikoa dela. Hartu beharreko erabakiak ugari dira. Izan ere, jendeak ezagutzen eta dantzatzen duen musika orokorrean irratiko musika komertziala izan ohi da. Saioetan hori soilik jarriz gero, nola ezagutuko du jendeak inoiz deus berririk? Hau bezalako mila galdera egin ondoren zera egin ohi dut normalean:

-Era guztietako musika jarri (niri hala gustatzen baitzait)

-Gustoko ez dudan ezer ez jarri (nor izango nintzateke bestela)

-Euskal Herrian nagoelarik behintzat, nagusiki euskarazko musika jarri.

-Ahal dela enpresa handiek ekoiztutako musika ekidin (nahiz eta batzutan The Clash edo Lady Gaga kolatzen diren)

-Jendeak eskatzen dituen kantak jarri soilik maitasunez eskatzen badituzte, eta baldin badauzkat.

-Letra sexista, homofobo edo txungitoak dituzten kantak alboratu eta mezu interesgarri edo politak dituztenak probestu.

-Arau guzti hauek hankaz gora jarri unean bertan hala erabakitzen badut.

Ikusten nola DJ izatea gauza konplikatua den? Baina ez teknikoki, ez, bestela! Azkenaldian eta bere espektakulilloa apur bat indartu asmoz irudi proiektore bat edo birekin lagunduta irudiekin laguntzen ditu musika saioak. Entzulearen esperientzia ikuslearena ere izan dadin eta mezu batzuk musikaz soilik baino are garbiago eman ahal izateko, edo agian soilik modan dagoelako, auskalo.

FABE DE FUKA

Artean gazteak ginela, Zorrotzako gizarte migimendu baten barruan zegoen egitasmo bati eman nahi izan genion segida: Txiri-Txori-Ume berbena. Horrela hasi ginen eta auzoko jaiak etortzear zirela, Udalak adierazi zuen urte hartako jaiek ez zutela diru gehiegirik jasoko. Gure burnuinak burrunbaka hasi eta erabaki genuen musika talde bezala irtenbidea eman behar geniola egoera horri.

Hara, umeekin egiten genituen kantak eta jokuak umeak ez ziren lagunekin konpartitu nahi izan genituen. Eta horrela sortu zen Txiri-Txorra. Hainbat urtetan agertokietan ibili ondoren, 2011ko asanblada batean erabaki genuen agertokiak burges samarrak zirela guretzat eta erabaki genuen kale gorrian egitea espektakulua. Aldaketa horri ponpa handia emateko, izena aldatzeko unea heldu zela erabaki genuen. Luze hausnartu ondoren, FABE DE FUKA izango zela gure izena suertatu zen. Erabaki genuen izenik itxusiena jartzea eta horixe izan zen topatu genuen onena.

FABE DE FUKA kontzertu ibiltaria da. Normalean eragile sozialek deitzen digute eta bakoitzari azaltzen diogu zein den gure filosofia. Musikarien duintasuna eta kolektiboak indartzea. Batzuetan, kolektibo horiek diru eskasa dutenez eta bestetan eragileek helburu soziala duen ekitaldia antolatu ohi dutenez, gure jarrera nahiko garbia da alde horretatik. Kolektiboak jartzen du guri eman beharreko katxea (edo katxetea…). Autogestioan sinisten dugu eta horrexegatik deitzen digutenek emandako diruak eta gurekin Mojitoa saltzen duen gurditxo magikoak sustatzen dute proiektu hau.

Bertsioak egiten ditugu, oso estilo diferentekoak. Ska, punk, patxanga, Pop, Rock, flamenko, (Raphael ze estilo da?)… Baina bertsio bat gure eskuetatik pasa ondoren, esan dezakegu gure ikutua ematen diogula, beraz, hara etiketen munduan sartzeko darabilgun estiloa:

Performance Karate Punk!!!

Baina musikaz gain, publikoari beste gauza bat eskatzen diogu. Guk jartzen ditugu juergarako oinarriak, bai, publikoak parte-hartzea jarri behar du. Hala, musika entzute pasibotik ikuskizun parte-hartzailea aldarrikatzen dugu.

Bilboko Konpartsak: “Zaindu maite duzuna!”

Bilbotar agurgarriok:

Gaurko egun honetan, behin eta betiko garbitu eta desinfektatzeko produktua aurkeztera gatozkizue. Zurien uzten duena, arrunkeria erabat ezabatzen duena… nola ez, Azkunejo Lixiba! Azkuna ekipoak, hau da, A ekipoak, Bilboko Udaletxeko estoldetako laborategietan garatu eta landutako azken produktua: Azkunejo Lixiba!

Zorritsu konpartseroz betetako jai batzorde mistoa pairatu behar duzula? Azkunejo Lixiba! Antzuak diren eztabaidak desagertuko dira, eta A ekipoak ongibidean aldebakarrez hartutako erabaki jakintsuak besterik ez dira ikusiko!

Zorritsuen txosnen ondoan Txikigunetik gure ume garbi eta perfektuek askatasun eta alaitasunean bizitako jaia entzun eta arnastu behar dutela? Azkunejo Lixiba! Eta Txikiguneko umeak, Areatzako ahate itsusi izan barik Kasildako zisne glamuroso bihurtuko ditugu magia bidez!

Arriaga erdian idi zikinek ekarritako jatun borono txapeldun menditarra, Gargantua izeneko panpina duzula? Azkunejo Lixiba! Boronoa disimuluz Txikiguneko puzgarrien artean ezkutatuko dugu lozorroan, txirrista sinple bat izango bailitzan!

Bizarraz jositako galtzarbe okelasdun gazte liskartsuen gustuko kontzertuak dituzula? Azkunejo Lixiba! Desinfektatu eta kontzertu kopurua, erdira! Jai eremutik urrun dagoen txiribitaz betetako Europa izeneko parkera bidaliko ditugu, erakargarriak ez diren taldeak ekarriko ditugu, eta kitto!

Auzokideak ez daudela ados, kexaka ari direla? Azkunejo Lixiba! Kexak desagertuko dira, eta bide batez, baita garrantzirik gabeko zuhaitzak ere!

Areatza bukoliko sannikoliano garbian eliza inoiz zapaldu ez duten gazte kementsu parrandazale eta parte-hartzaileek Konpartsero Eguna den akelarre sutsua ospatzen dihardutela? Azkunejo Lixiba eta desinfektatu! Eta Areatza garbi, distiratsu eta kanposantuak baino bareago geldituko da, bitartean Eguzkiaren su garbitzaileak konpartseroak kaian desegiten dituen bitartean!

Azkunejo Lixibak garbitu, desinfektatu eta distiraz beteta uzten baitu den-dena!

Izan ere, horrela utzi nahi dute Aste Nagusia. Gatzik gabeko Aste Nagusia, nortasun eta grazia bako festa, edukirik gabekoa. Turisten diru eta betikoen interes merkantilisten onura erakartzeko ekitaldien multzoa (“Bienvenido Mr Marshall”).

Herrikoia eta parte-hartzailea denagatik urrundutako Aste Nagusia. Sortu zuen eta definitzen duen esentziatik aldendutakoa.

Bilbotarrok ikusle-bezero bihurtu nahi gaituzte. “Nik agindu eta zuk bete”, bizitzako arlo guztietan bezala.

Aurten, bereziki, egoera oso gordina izaten ari da kontzertuei dagokienez. Azken bi urteotan kontzertu kopurua erdira murriztu da eta hauen kalitatea nabari jaitsi da (eta azken 10 urteotako bilakaera ikusita, aldaketa are lotsagarriagoa da); jai esparrutik urrun eraman dituzte, jai batzorde mistoa mespresatuz, Txurdinagako auzotarrekin hitz egin gabe, inongo eragileekin hitz egin gabe… Udal gobernuak erabakia hartu eta bete egin du.

Krisialdian gaudela, murrizketak egin nahi dituzte, baina horregatik are harrigarriagoa da Udalak 1,2 milioi euro 3 eguneko BBK Live festibal pribatuari ematea, Aste Nagusiko 9 egunetarako aurrekontua 2,5 milioi eurokoa den bitartean. Eta gogoratu Aste Nagusia bukatu ondoren, “En Vivo” izeneko musika jaialdi pribatua ere Udalak babestuko duela. Zenbat ordaindu beharko du bilbotar bakoitzak?

Argi eta garbi dago Udalak doako kontzertuekin bukatu nahi duela. Argudioa, “kalitate eta kantitatea nahi izanez gero, ordaindu beharra dago”. Bitartean, kontzertu gutxiago, eta jende gutxiago erakartzen dutenak. Kontzertu asko eta kalitate onekoak nahi dituena, bilbotarrok ordaindutako eta ez dakigu noren poltsikorako kontraprogramatu diren bi festibal pribatuetara joan dadila!

Hau al da nahi dugun Aste Nagusia? Espekulatzaile eta despotena?

Eraso hauen guztien aurrean, ozen oihu egin nahi dugu, haien bulegoen garaieretan jainkoak balira bezala bizi diren horiek entzun gaitzaten: Aste Nagusia ez da inongo Gobernu Talderean jabetza! Ezta konpartson jabetza! Aste Nagusia denok gara, eta Bilbo osoarena da! Beraz, utz ditzagun betiko borroka antzuak eta denontzako Aste Nagusia eraikitzen saia gaitezen, hiri zoragarri honen eta bere hiritarren mailan dagoen Aste Nagusia.

Eta argi gera dagiela, bisitatzen gaituzten milaka pertsonak ez datoz turistentzako diseinatutako festen ikusle izatera. Bakarra den jai honen, Aste Nagusiaren, berezitasuna ikustera eta bertan parte hartzera datoz. Eta berezitasun hau, hain zuzen, bere izaera herrikoi eta parte-hartzailean datza.

Eta jai honen izaera sinbolizatzeko, inposatu nahi diguten irudi triste eta huts hau berriro ere edukiz eta kolorez beteko dugu.

Aste Nagusia berezi egiten duen jai ereduan sinesten duzuen guztiok beragatik aurpegia ematera deitu nahi zaituztegu. Zuen aurpegia duten argazkiekin aurpegia ematera. Hauekin giza-collage erraldoia egingo dugu, Aste Nagusiaren eta bere eredu bereziaren alde apustu egiten dugun eta beragatik borrokatzeko prest gauden guztiok irudikatuko gaituela. Maite dugun hori zaindu behar dugulako.

Collage hau Aste Nagusia denaren eta izaten jarraitzea nahi dugunaren metafora polita izango da. Baina ez du inolako zentzurik izango Aste Nagusia Unibertso Munduko jairik onena izaten jarraitzeko denon inplikazio fisiko eta mentalean gauzatzen ez bada.

Aste Nagusian zehar (lekuak eta ordutegiak esango dizkizuegu) photocall bat egongo da, bertan zuen aurpegiko argazkia aterako dizuegu, bertan inprimatu eta collagean itsatsiko dugu. Baita, nola ez, collagearen bilakaera ikusteko aukera izango duzue. Guztion artean lortuko dugu collagea guztiz betetzea!!

Ezin bazara Aste Nagusian zehar egongo den photocollera hurbildu eta ekintza polit honetan parte hartu nahi baduzu ez kezkatu, bidaliguzu zeure argazkia eta guk inprimatu eta collagean itsatsiko dugu.

Zure argazkia bide ezberdinen bidez bidali dezakezu: zaindumaitedozuna@bilbokokonpartsak.com posta elektronikora edo 651 045 110 telefonora, edota Bilboko Konpartsen webgunean topa dezakezun formulario errazaren bitartez.

Gora Aste Nagusia! Gora Marijaia!

Txupinera eta pregoilaria baditugu!

Argazkia: iraiaiturregi.com

Honezkero osatuta dekogu Aste Nagusiko bikoterik ospetsuena. Txupinera Jone Artola izango da, Txori Barrote konpartsak orain egun batzuk ezagutzera eman zuenez. Jakingo duzuenez, urtero txupinera aukeratzeko txanda zozketatzen da oraindik txupinerarik izan ez duten konpartsen artean, eta aurten Txori Barrote konpartsari egokitu zaio bere txupinera aukeratzea. Aste Nagusia 2013ko Pregoilaria, berriz, Iraia Iturregi Athleticeko kapitaina izango da. Zorionak bioi!

Bestalde, Bilboko Konpartsek handitzen jarraitzen dute eta federakundean konpartsa berri bat sartu da. Piztiak, konpartsa animalista du izena eta Konpartsero Egunean ikusiko dugu Areatzatik. Ongi etorri!

Barnetegia Bilboko jaietan!

Euskara ikasten zabiltzala, baina klaseetaz aspertuta zaudela? Euskaldunak ezagutu nahi dituzu Bilbon euskaraz bizi ahal izateko? Ba eman izena Hau Pittu Hauk jaietan antolatzen duen Barnetegiaren bigarren edizioan.

Jaiak euskaraz bizitzeko aukera aparta: dantzatu, kantatu, lagunak egin, kontzertuak ikusi, elkarlana, herri bazkariak, kirol eta jolasak, garagardo lehiaketa, konpartsa giroa… Ez duzu erraz ahaztuko 2013ko Aste Nagusia!

Jarri gurekin harremanetan: barnetegia@haupittuhau.org
Xabi (645 009 790)
Leire (630 362 736)

Eraiki euskaldunon konpartsa!

Euskalduna eta euskaltzalea bazara eta Bilboko Aste Nagusia euskaraz bizi nahi baduzu, zeure konpartsa Hau Pittu Hau da! Jaiak barrutik, parte hartuz eta euskaraz bizi nahi badituzu, jarri gurekin harremanetan!

Konpartsa bizirik mantentzeko jende berriaren laguntza behar dugu. Langileak, dinamizatzaileak, aldarrikatzaileak, komunikatzaileak, diseinatzaileak, antolatzaileak, eskalatzaileak, musikariak, dantzariak… denetariko jendearen beharra daukagu. Elkarlanean jai euskaldunak erakiko ditugu!

Jarri gurekin harremanetan: eraiki@haupittuhau.org
Xabi (645 009 790)