Hau Pittu Hau – Euskaldunon konpartsa

Bilbotar agurgarriok:

Gaurko egun honetan, behin eta betiko garbitu eta desinfektatzeko produktua aurkeztera gatozkizue. Zurien uzten duena, arrunkeria erabat ezabatzen duena… nola ez, Azkunejo Lixiba! Azkuna ekipoak, hau da, A ekipoak, Bilboko Udaletxeko estoldetako laborategietan garatu eta landutako azken produktua: Azkunejo Lixiba!

Zorritsu konpartseroz betetako jai batzorde mistoa pairatu behar duzula? Azkunejo Lixiba! Antzuak diren eztabaidak desagertuko dira, eta A ekipoak ongibidean aldebakarrez hartutako erabaki jakintsuak besterik ez dira ikusiko!

Zorritsuen txosnen ondoan Txikigunetik gure ume garbi eta perfektuek askatasun eta alaitasunean bizitako jaia entzun eta arnastu behar dutela? Azkunejo Lixiba! Eta Txikiguneko umeak, Areatzako ahate itsusi izan barik Kasildako zisne glamuroso bihurtuko ditugu magia bidez!

Arriaga erdian idi zikinek ekarritako jatun borono txapeldun menditarra, Gargantua izeneko panpina duzula? Azkunejo Lixiba! Boronoa disimuluz Txikiguneko puzgarrien artean ezkutatuko dugu lozorroan, txirrista sinple bat izango bailitzan!

Bizarraz jositako galtzarbe okelasdun gazte liskartsuen gustuko kontzertuak dituzula? Azkunejo Lixiba! Desinfektatu eta kontzertu kopurua, erdira! Jai eremutik urrun dagoen txiribitaz betetako Europa izeneko parkera bidaliko ditugu, erakargarriak ez diren taldeak ekarriko ditugu, eta kitto!

Auzokideak ez daudela ados, kexaka ari direla? Azkunejo Lixiba! Kexak desagertuko dira, eta bide batez, baita garrantzirik gabeko zuhaitzak ere!

Areatza bukoliko sannikoliano garbian eliza inoiz zapaldu ez duten gazte kementsu parrandazale eta parte-hartzaileek Konpartsero Eguna den akelarre sutsua ospatzen dihardutela? Azkunejo Lixiba eta desinfektatu! Eta Areatza garbi, distiratsu eta kanposantuak baino bareago geldituko da, bitartean Eguzkiaren su garbitzaileak konpartseroak kaian desegiten dituen bitartean!

Azkunejo Lixibak garbitu, desinfektatu eta distiraz beteta uzten baitu den-dena!

Izan ere, horrela utzi nahi dute Aste Nagusia. Gatzik gabeko Aste Nagusia, nortasun eta grazia bako festa, edukirik gabekoa. Turisten diru eta betikoen interes merkantilisten onura erakartzeko ekitaldien multzoa (“Bienvenido Mr Marshall”).

Herrikoia eta parte-hartzailea denagatik urrundutako Aste Nagusia. Sortu zuen eta definitzen duen esentziatik aldendutakoa.

Bilbotarrok ikusle-bezero bihurtu nahi gaituzte. “Nik agindu eta zuk bete”, bizitzako arlo guztietan bezala.

Aurten, bereziki, egoera oso gordina izaten ari da kontzertuei dagokienez. Azken bi urteotan kontzertu kopurua erdira murriztu da eta hauen kalitatea nabari jaitsi da (eta azken 10 urteotako bilakaera ikusita, aldaketa are lotsagarriagoa da); jai esparrutik urrun eraman dituzte, jai batzorde mistoa mespresatuz, Txurdinagako auzotarrekin hitz egin gabe, inongo eragileekin hitz egin gabe… Udal gobernuak erabakia hartu eta bete egin du.

Krisialdian gaudela, murrizketak egin nahi dituzte, baina horregatik are harrigarriagoa da Udalak 1,2 milioi euro 3 eguneko BBK Live festibal pribatuari ematea, Aste Nagusiko 9 egunetarako aurrekontua 2,5 milioi eurokoa den bitartean. Eta gogoratu Aste Nagusia bukatu ondoren, “En Vivo” izeneko musika jaialdi pribatua ere Udalak babestuko duela. Zenbat ordaindu beharko du bilbotar bakoitzak?

Argi eta garbi dago Udalak doako kontzertuekin bukatu nahi duela. Argudioa, “kalitate eta kantitatea nahi izanez gero, ordaindu beharra dago”. Bitartean, kontzertu gutxiago, eta jende gutxiago erakartzen dutenak. Kontzertu asko eta kalitate onekoak nahi dituena, bilbotarrok ordaindutako eta ez dakigu noren poltsikorako kontraprogramatu diren bi festibal pribatuetara joan dadila!

Hau al da nahi dugun Aste Nagusia? Espekulatzaile eta despotena?

Eraso hauen guztien aurrean, ozen oihu egin nahi dugu, haien bulegoen garaieretan jainkoak balira bezala bizi diren horiek entzun gaitzaten: Aste Nagusia ez da inongo Gobernu Talderean jabetza! Ezta konpartson jabetza! Aste Nagusia denok gara, eta Bilbo osoarena da! Beraz, utz ditzagun betiko borroka antzuak eta denontzako Aste Nagusia eraikitzen saia gaitezen, hiri zoragarri honen eta bere hiritarren mailan dagoen Aste Nagusia.

Eta argi gera dagiela, bisitatzen gaituzten milaka pertsonak ez datoz turistentzako diseinatutako festen ikusle izatera. Bakarra den jai honen, Aste Nagusiaren, berezitasuna ikustera eta bertan parte hartzera datoz. Eta berezitasun hau, hain zuzen, bere izaera herrikoi eta parte-hartzailean datza.

Eta jai honen izaera sinbolizatzeko, inposatu nahi diguten irudi triste eta huts hau berriro ere edukiz eta kolorez beteko dugu.

Aste Nagusia berezi egiten duen jai ereduan sinesten duzuen guztiok beragatik aurpegia ematera deitu nahi zaituztegu. Zuen aurpegia duten argazkiekin aurpegia ematera. Hauekin giza-collage erraldoia egingo dugu, Aste Nagusiaren eta bere eredu bereziaren alde apustu egiten dugun eta beragatik borrokatzeko prest gauden guztiok irudikatuko gaituela. Maite dugun hori zaindu behar dugulako.

Collage hau Aste Nagusia denaren eta izaten jarraitzea nahi dugunaren metafora polita izango da. Baina ez du inolako zentzurik izango Aste Nagusia Unibertso Munduko jairik onena izaten jarraitzeko denon inplikazio fisiko eta mentalean gauzatzen ez bada.

Aste Nagusian zehar (lekuak eta ordutegiak esango dizkizuegu) photocall bat egongo da, bertan zuen aurpegiko argazkia aterako dizuegu, bertan inprimatu eta collagean itsatsiko dugu. Baita, nola ez, collagearen bilakaera ikusteko aukera izango duzue. Guztion artean lortuko dugu collagea guztiz betetzea!!

Ezin bazara Aste Nagusian zehar egongo den photocollera hurbildu eta ekintza polit honetan parte hartu nahi baduzu ez kezkatu, bidaliguzu zeure argazkia eta guk inprimatu eta collagean itsatsiko dugu.

Zure argazkia bide ezberdinen bidez bidali dezakezu: zaindumaitedozuna@bilbokokonpartsak.com posta elektronikora edo 651 045 110 telefonora, edota Bilboko Konpartsen webgunean topa dezakezun formulario errazaren bitartez.

Gora Aste Nagusia! Gora Marijaia!

Iturria: © Bilboko Branka

Txori Barroteko kide batek jaurtiko du abuztuaren 17an aurtengo Aste Nagusia abiatuko duen txupina. Jai eredu mistoaren ezaugarria da pregoilaria Udalak aukeratzea eta txupineraren hautaketa, berriz, konpartsen eskuetan geratzea. Oraindik, baina, ez dute ezagutzera eman pregoia eta txupin jaurtitzea nortzuek egingo duten.

Udalaren jomugan egon izan da beti Txori Barrote. Euskal presoen eskubideen aldeko konpartsa izanik, hauen argazkiak erakusteak polemika piztu zuen 2009ko Aste Nagusian. Ertzaintza jai eremuan sartu zen Txori Barroten eta Kaskagorri konpartsen txosnetan argazkiak kentzera eta hainbat kide auzipetu zituzten terrorismoa goratzeagatik. Auzitegi Nazionalak, ordea, absolbitu egin zituen denak.

Azkunaren Gobernuak, gainera, bi konpartsa horiei bi urtez txosna jartzeko debekua ezarri zien baina gerora EAEko Justizia Auzitegi Nagusiak alkatearen debekua baliorik gabe utzi eta erabaki hura hartzeko eskumenik ez zuela ebatzi zuen, erabakiaren bidegabekeria agerian utzita. Nolanahi ere, epaia berandu iritsi zen, bai Txori Barrotek baita Kaskagorrik ere bi urteko zigorra beteta zutelako.

Konpartsek jaien aurkako eraso gisa hartu zuten alkatearen erabakia eta protesta bezala jaietako asteazkenean txosnak ixtea erabaki zuten debekuak iraun zuen bi urteetan.

Klik egin kartelaren gainean handiago ikusteko

Aste Nagusiko kontzertuak direla eta hainbat aste bueltaka ibili ostean, eta beharrezko informazioa bildu ondoren, Bilboko Konpartsok uste dugu beharrezkoa dela, eta horrela egingo dugu, azken aste eta urte hauetan Bilbon Aste Nagusiaren inguruan gertatzen ari direnen azterketa serio eta sakona egitea. Hasteko, eta guztiz argi gera dadin, askotan errepikatu dugun bezala, eta orain dela aste gutxi prentsa ohar baten bidez gogoratu dugun bezala, Aste Nagusiko kontzertuetarako Bilboko Konpartson proposamena orain dela urte askotatik (gogoratu dezagun gai hau Gas plazako lanak hastean planteatu zela) Etxebarria parkea da. Eta ez bakarrik kontzertuak egiteko espazio bezala. Metroko obrak bukatzen direnerako aukera ezberdinak aztertu behar dira, barrakak bertan mantenduz eta zirkua bere inguruabar eta beharretara hobeto egokitzen den espazio batera mugituz, bertan kontzertuetarako eta jai esparrutik aldendu diren beste elementu batzuk kokatzeko leku nahikoa egon daiten. Argazkian, Bilboko Konpartsen agerraldi bat artxiboko irudian.

Bilboko Konpartson iritziz, bilbotar eta bisitari guztiok merezi dugun maila eta kalitateko Aste Nagusia mantentzeko borondatea baldin badago, mahaian jarri diren ustezko arazo teknikoak erraz gainditu daitezke, barrakek, kontzertuek eta bestelako elementuek lekua izan dezaten eta segurtasun arazorik egon ez dadin espazioa berrantolatuz.

Ordea, guretzat benetan kezkagarria dena ez da horrenbeste kontzertuen kokapenaren arazo teknikoa, baizik eta hauek nola erabiltzen ari diren hauen inguruko polemika artifizial bat sortzeko.

Alde batetik, auzokideen artean polemika sortu da Udaletxe honek erabiltzen dituen modu autoritarioak direla eta. Bestalde, espazioen egokitasunaren inguruko eztabaida bat sortu da, iaz Karola espazioarekin gertatu zen bezala: edozeinek Aste Nagusiko kontzertuak egiteko espazio egokia ez zela zekien arren, Udaleko Gobernu Taldeak kontzertuak bertan sartu zituen, kontzertuen inguruko polemika handia sortuz. Honi gehitu behar diogu aurtengo kontzertuak oraindik lotu gabe daudela, nahiz eta talderen bat hitzartuta izan, baina oraindik lotu gabe (espero dugu prentsaurreko honek gai hau arintzeko balio izatea, gutxienez esandakoa gezurtatzeko).

Eta, aurrekoa gutxi balitz, ordaindu beharreko beste kontzertu mota batzuk egiteko aukeraren inguruko datuak entzuten hasi gara. Eta hor dago Aste Nagusiko kontzertuen inguruan sortzen ari den zorabio edo polemika artifizialaren benetako arrazoia. Hau da, beldur gara Udalaren plana kontzertuen inguruko polemika faltsu bat sortzea ez ote den, azkenean, polemika hauen eta ustezko arazo teknikoen ondorioz, dohainezko leku ireki batean egin ezin daitezkeela planteatzeko, eta gune itxi batean eta kobratuz egin behar direla esateko: bai Bilbao Arena bezalako espazioetan, bai Kobetamendi bezalakoetan, makro-kontzertu formatua erabiliaz, hain justu Aste Nagusi osteko asteburuan antolatu den makro-kontzertuaren formatuan.

Aste Nagusi osteko asteburuan makro-kontzertu batzuk antolatzeak, Aste Nagusia bera kontraprogramatuz, ez du inolako logikarik, Aste Nagusia honelako kontzertu motarekin lotzeko interesen bat ez bada, batez ere gero eta indar gehiagorekin entzuten den zurrumurrua kontuan izanda, hau da, Udal Gobernu Taldearen asmoa Aste Nagusiaren datak aldatzea dela, oraindik aurrera beti abuztuko azken bi asteburuetan izateko, bigarren asteburuak “En Vivo” kontzertuekin bat eginez.

Gure ustez hau da Udalaren benetako asmoa: Aste Nagusitik dohainezko kontzertu handiak desagerrarazteko aitzakiak bilatzea, dohainezko kontzertu hauek Aste Nagusiaren ezaugarrietariko bat izan direnean, eta Udalak berak ezaugarri hau erabili izan duenean inguruko eta atzerriko bisitariak erakartzeko “Total free” (edo “totally free”, besteontzako) leloarekin.

Asmo honi erantzuten diote auzokideekin sortutako polemikek, eskusa teknikoak erabiliaz Bilbon dohainezko kontzertu handiak egiteko leku aproposik existitzen ez dela behin eta berriro errepikatzeak, eta justu Aste Nagusi ostean izango den makro-festibal batean inbertitzeak (gainera etorkizunean Aste Nagusiarekin kointziditu dezakeenak, festibal paralelo bat izanda eta Aste Nagusia bera desaktibatuz).

Aurreko guztia argi geratzen da aldi berean urtez urte Aste Nagusiko dohainezko kontzertuen kantitatea eta kalitatea nola jaisten diren ikusten dugunean. Gogoratu dezagun gau bakoitzean 2 kontzertu handi egitetik bakarrera pasatu garela, gainera lehenengo bi gauetako kontzertuak zuzenean ezabatu direlarik, eta orokorrean nola jaitsi den taldeen kalitatea, aurreko urteotan publikoki esan dugun bezala.

Beraz, momentu honetan mahai gainean duguna Aste Nagusia pribatizatzeko egitasmoa besterik ez da, behintzat kontzertuei dagokienez.

Bilboko Konpartsak benetan arduratuta gaude Udala ematen ari den pausu hauek direla eta. Jai ereduaren alde dagoela esanda ahoa betetzen zaion bitartean, honen elementu zentralak desagerrarazteko pausutxoak ematen doa.

Ildo honetan, Aste Nagusiaren diseinuan aldaketak egiten doa, handiagoak edo txikiagoak, esaterako elementuak jai esparrutik aldenduz (esaterako, Txikigunea). Ezin dugu ahaztu sailak unilateralki erabaki zuela (dagoeneko ohikoa denez) Aste Nagusiaren beste irudi nagusienetariko bat aldatzea, jaietako zapia, ohiko Bilbo urdin zapia Aste Nagusiarekin zerikusirik ez duen zapi batengatik aldatzen saiatuz, bere helburu bakarra Aste Nagusia eta bere elementuak turismoarentzako produktu hutsak bailira bezala saltzea izanda.

Batzuetan oihartzun handirik ez duten proposamenak botatzen ditu, jendarteak ere ezagutzen ez dituenak. Honen adibide dugu iaz Aste Nagusia baino aste gutxi lehenago Txupinera eta Pregoilariaren jantziak aldatzeko saiakera, Aste Nagusiaren irudien kontrako eraso argia, eta aurten edota hurrengo urteetan saiakera bera egingo dutelako zurrumurruak indartzen doaz.

Honek guztiak Aste Nagusiarekiko eta bere irudiek ordezkatzen dutenarekiko, eta beren jatorri eta bilbotarrokin duten loturarekiko mesprezu izugarria erakusten du, eta hau guztia jai eredua defendatzen dutela esaten dutenen eta hau egiteko behar instituzionala dutenen eskutik.

Beldur gara jaietako irudiei egiten zaizkien eraso hauek, kontzertuek zenbat molestatzen dutenaren inguruan sortutako polemika faltsuekin batera, auzokideak modu lotsagarrian erabiliaz, jai ereduan aldaketak egiten joatea bilatzen dutela.

Berriro ere, eta tamalez ez da ez lehenengo ez bigarren aldia, jaiak baketan utz ditzatela eskatu nahi dugu. Bilbon besterik ez dagoen eredu hau, behin eta berriz formatu ezberdinetan erasoak pairatzen dituena, oso arrakastatsua da, urtez urte Aste Nagusiak duen partaidetza handiak eta Unescok ondare kultural izendatu izanak erakusten duten bezala.

Gure aldetik, hobetzeko eta 78ko eredua oinarritzat hartuz garatzeko apustu garbia egiten jarraitzen dugu, eta hau Jai Batzorde Mistoan borrokatzen jarraituko dugu, hau baita borrokatzeko lekua.

Aste Nagusia bizirik dago eta konpartsek bizia ematen jarraituko dugu!

Bilboko Konpartsen Federakundea

Argazkia: © Bilboko Konpartsak.

Bilboko Konpartsek eta Txarriduna txerriaren akademiak 2012ko Klin-Klon sariak banatu dituzte gaur goizean. Saria honek San Tomas nekazaritza azokaren izpirituaren zaintzaren eta zabalkundearen alde egindako ekarpena aitortzen du eta “Klin-Klon” ezizenaz ezaguna egin zen Felix Garcia Arceluzek sortu zituen 1915ean.

Beren saltokiak hoberen apaindu dituzten saltzaileak eta azoka giroa irudikatzen duen argazkirik onenak saritzen dira.

Azken edizio honetan, Santo Tomas azokaren 97.a, honakoak izan dira sarituak:

• Itziar Etxebarria – Fruta eta barazki erakusmahai onena
• Koldo Belasco – Ezti posturik onena
• Erdikoetxe Sagardoa – Txakolin saltoki onena
• Juan Antonio Zabala – Animali bizien (euskal antzara eta oiloak) posturik onena
• Iñigo Aurrekoetxea – Hestebeteen saltokirik onena
• Prentsan agertutako argazkirik onena, berriz, Argazki Pressek eskuratu du “Berria” egunkarian argitaratutako irudi bati esker.
• Azokari buruzko erreportaje onenaren saria, aldiz, “Deia” egunkariak jaso du.

From 2012ko Inauteriak

Argazkian, iaz lorazainez joan ginen Hau Pittu Hauko kideok. Aurten, ezetz asmatu!

Igandean Pontxe eta Tostada Lehiaketa egin bazen ere, bihar, osteguna, Inauteriei. Bilboko Konpartsek prestatutako egitarauaren barruan, Farolin eta Zaranbolasen epaiketarekin ondoren, txorizo banaketa egingo da Plaza Barrian. 20:30ak aldera, Trapu Zaharrek kalejira abiatuko dute Zazpi Kaleetan barrena.

Ostiralean, hilak 8, umeen desfilearen ostean, 12:30ean, txokolatada egongo da Plaza Barrian eta 20:00etan Bilbo Kantarik edizio berri bat eskainiko du.

Larunbatean, arratsaldeko 18:00etan konpartsen desfilea abiatuko da Plaza Biribiletik eta, udaletxera heltzean, Azkuna alkateak omenaldia jasoko du. 21:00etatik 21:30era sari banaketa egingo da Plaza Barrian.

Igandean, 09:00etan, indaba lehiaketa egingo dute Plaza Barrian eta, asteartean, hilaren 12an, sardinaren ehorzketak bukaera emango die Aratusteei 19:30etatik aurrera.

Baina, Bilboko Konpartsakek antolatutaklo inauteriez gain, auzoek ere euren egitaraua prestatu dute.

Arangoiti

Egun bakarrekoak izango dira Arangoitiko Txapel Inauteriak. Otsailaren 9an, eguerdiko 12etan, emango zaie hasiera trikitixa eta txalaparta doinuekin. 13:00etatik 14:00etara, Egileor plazan mozorro lehiaketa burutuko da. 14:30ean putxeren topaketaren txanda izango da parkean eta 15:00etan, indabak dastatzeari ekingo diote. Arratsaldeari begira, 17:00etan, mozorro lehiaketako sariak banatuko dira. 17:30ean, antzerki laburra eskainiko dute “Arangoitiko metro sarbide berriaren inaugurazioa antzeztuz”. Eta 18:00etatik 19:00etara, Goiri batukadaren laguntzaz koadrilek kalejira egingo dute auzoan zehar.

Buia

Buiako Auzokide Elkarteak mozorro lehiaketa eta dantzaldia antolatu ditu otsailaren 9an, larunbata, auzoko udaltegian. 19:30ean hasi eta gaueko 22:30ean bukatuko da eta auzokide guztiei disko festan parte hartzeko gonbitea luzatu diete.

Abusu

Otsailaren 8an egitarau zabala eskainiko dute Abusuko Inauterietan. Hilaren 8an, ostirala, 17:30ean, aratusteei hasiera emango zaie Ibaizabal zelaian eta bertan, tailerrak, musika eta puzgarriak egongo dira. 18:00etan, Disparate konpainiak antzerkia eskainiko du. 19:00etan, mozorro lehiaketari ekingo diote eta 19:30ean, Bolintxurekin batukada egongo da auzoan zehar eta ogi-txigortuaren dastaketa. 20:00etatik aurrera, Errerre txarangak auzoa alaituko du eta 23:00etan inauteriei amaiera emango zaie. Aipatzekoa da ere Meatza elkartean inauteri jaia egingo dela eta gaia ere zehaztu dutela. Aurten, Ali Baba eta 40 lapurren inguruan mozorrotu beharko dute hurbiltzen diren lagunek.

Santutxu

Otsailaren 14an, osteguna, helduko dira Inauteriak Santutxura. Egun horretan, Ximelgorria aisialdi taldeak inauterietako ekintzak eskainiko ditu Karmelo plazan goizeko 10:00etatik arratsaldeko 17:00etara. Hilaren 15ean, ostirala, 17:30ean Txoro eta Mokoko pailazoak ikusteko aukera egongo da Karmelon; eta 19:30etik aurrera albokariak ibiliko dira auzoan zehar. Larunbatean, Gaztedi dantza taldeak ikuskizuna eskainiko du auzoko hainbat txokotan 19:30ean.

Bukatzeko, desfilea igandean, hilaren 17an izango da, 12:00etan. Santutxu kaletik hasiko da eta auzoa zeharkatuko du. Hori gutxi balitz, 18:00etan, Arsuaga plazan DJ batek giroa alaituko du.

Zorrotza

Auzo honetako inauteriak otsailaren 15ean hasiko dira. Egun horretan, 21:00etan, Sunk Itii funky-jazz taldearen kontzertua egongo da Alboka tabernan. Larunbatean, hilaren 16an, 16:45ean, inauterietako jaitsieran izena emateko epea zabalduko da Zorrotzagana plazan eta 17:30ean, aratusteetako jaitsiera abiatuko dute plaza beretik Txinbotarrak eta Zorrotzako Jai Batzordearen animazioarekin. Ondoren, 18:45ean, taberna eta denden VIII. Mozorro lehiaketaren sari banaketa egingo da. 19:00etan, Azoka parkean desfileko sari banaketa burutuko dute eta bukatzeko, 19:30ean, txokolate jana egongo da.

Gogoratzen dizuegu Bilboko Plaza Berrian 2013 Inauterien programazioaren barnean, igande honetan, otsailaren 3an, eguerdiko 12etan Pontxe eta Tostada Lehiaketa egongo dela. Etxetik eraman behar dira bai pontxeak, bai tostadak. Eta aurtengo Farolin den Manu Iturregi zuzenean pontxe berezi  bat prestatuko digu bertan. Bilboko Konpartsek parte hartzeko deialdia zabaltzeko eskatzen dizuete.

Eskerrik asko.

Bilboko Konpartsek, Bilboko hiritar eta bilauak, otsailaren 3an eguerdiko 12etan egingo den hirugarren pontxe eta tostada txapelketan parte hartzera gonbidatzen dituzte. Bertara jangarriak etxetik eginda eraman behar direlarik. Txapelketa hau profesionalentzat zein herritarrentzat irekia da, kontuan izanda profesionalek aldez aurretik apuntatu behar direla horretarako 2 modu daude:

• bidali emaila helbide honetara bulegoa@bilbokokonpartsak.com
• deitu honako telefono zenbakira 94 679 13 06 (10:00-13:00)

“The City Mayors Foundation” fundazioak iragarri du, Berorren Udal Gorentasuna, Iñaki Azkuna Jauna (hemendik aurrera BUG) Munduko Alkaterik onena dela. Hori sorpresa!

Ondorio honetara ailegatzeko luze ibili dira eztabaidan eta are lotsagarriagoa dena, BUG beste Munduko Alkateekin alderatzen ibili dira! Gauza guztiz zentzugabea dena, Begoñako Ama errekako itsas-arratoiekin alderatzea bezain zentzugabea.

Bilboko Konpartsok, bilbotar guztiek bezalaxe, bagenekien BUG Munduko Alkaterik onena dela. Mundukoa, Eguzki-Sistemakoa, Galaxiakoa eta, hortaz, Unibertsokoa. Eta ez soilik Alkaterik onena, baizik eta pertsonarik onena, dotoreena, txireneena, eskuzabalena, apalena eta ederrena ere. Eta honaino helduko gara, zeren jakin badakigu BUGek ez duela koipetua izatea batere gustuko eta ez dugu nahi “tiralevitas” batzuk garela entzutea.

Gaur guztiz bilbotarra eta adierazgarria den Arte Eder Museoan elkartu gara Bilboko Konpartsen inauterietarako programazioa ezagutarazteko. Zuek asmatutako polemika batez markatutako programazioa izango da, bai, zuek prentsa “canallesca” delakoaren parte zareten neskato eta mutilkoak.

Zuen berriketa-lekuetan BUGek Gran Viatik desfilatzea debekatu egin digula eta horregatik guztiz atsekabeturik gaudela esan egin da, baina bai zera! Bilboko Konpartsetan jakin badakigu BUGentzat bere seme-alabak bezalakoak garela. Izan ere, ziur gaude elkarrizketaren batean BUGri hauxe esaten entzun zaiola: Konpartseroak piiiiiiii kumeak dira!! (ez dugu esaldi osoa entzun baian ziur gaude “gure kumeak” esan duela).

Gauza da, hain Aita ona izanda, eta Bilboko Inauterietan beti izaten dugun eguraldi eskasa kontuan hartuta, BUGek desfilearen ibilbidea laburragoa egiteko aukera oparitu egiten digula katarroa ez harrapatzeko. Beste aldetik, jakin izan dugu, Gran Viatik desfilatzen tematzen baginen, Udaltzain multzo batzuk bidaltzeko prest zegoela, gu guztiok berotzeko eta horrela burutuk beherakoak ekiditzeko. Horrenbesteko paternalismoak txunditu egiten gaitu.

Bilboko Konpartsok inauteri hauek, BUGentzako merezitako omenaldi eder bat bihurtzea erabaki dugu. Gaur, Arte Ederretako Museoari egindako kuadro honen dohaitzarekin hasiko dugu omenaldia. Kuadro honek, BUGen pertsonalitatea ezin hobeto jasotzen du, eta pinakotekaren lehentasunezko lekuan ikusgai egotea merezi du, bilbotar eta bisitarien gozamenerako.

Hemen gurekin dugun durangotar, eta berez BUGen herrikidea den Mikel Aingeru Buonarrotti pintore ospetsuak egindako oleo bat da.

Koadroan BUG langile eta umil ikus dezakegu, txikitzen gaituen krisiagatik guztiz arduratua. Ia ezkutaturik Alkatearen Makila ikus dezakegu eskuan, lotsati gordetzen saiatzen bada ere. Berdin Legioaren Jaun Ohorezko Gurutzearekin, erreparatzen ez duenarentzat ia sumagaitza dena. Bere aurpegia inauterietako mozorro baten atzean ezkutatzen da, berak protagonista izateko ez duen gogoa eta benetan duen jai eta inauterietarako gogoaren adierazle.

Bilboko Konpartsok BUGeri eskeiniko diogun omenaldi eder eta erraldoiaren aurrerapen txiki bat baino ez da gaurkoa. Datorren otsailaren 9ko desfilean egingo duguna ezusteko berezi eta handia izango da, bertara hurbilduko diren lagun guztiak aho bete hortz uzteko ahalegin guztiak egingo ditugu. Egoki da eta zuzen eta, batez ere ahanztezina izango da.

Pontxe eta tostaden bigarren edizioarekin hasiko gara, Inauterien aurreko domekan izango da Plaza Barrian eguerdiko 12:00etan.

Eta inauterietako datetan sartuta, otsailaren 7an osteguna, Plaza Barrian Farolin eta Zarambolasen epaiketa eta gero txorizo banaketa egingo dugu eta 20:30 aldera Alde Zaharrean zehar Trapu Zaharrak kalejirari hasiera emango diogu. Kalejira honetarako trapu zaharrez betetako kutxa batzuk izango ditugu nahi duen guztia mozorratuta joateko.

Eta iragarri bezala otsailaren 9an, larunbata arratsaldeko 6etan Desfilea egingo dugu (ez ahaztu gure omenaldirako sorpresa!) Plaza Zirkularretik abiatuta Buenos Aires kalea zeharkatu Udaletxeraino, hortxe desfilearen epaileak egongo dira balorazioa egiteko eta gerora banatuko diren sariak aukeratzeko, eta hortik Arriagaraino joango da desfilea. Sari banaketa gaueko 21:00ak edo 21:30 aldera izango da Plaza Barrian.

Domekan, otsailaren 10an, berriro Plaza Barria berreskuratzen dugu Indaben Lehiaketarako. Goizeko 9:00etan hasi egingo dena eta izena ematea doakoa izango da.

Eta amaitzeko Sardinaren ehorzketan Bilbo osoa parte hartzeko deia egiten dugu, arratsaldeko 19:30ak aldera Plaza Barritik Arriagaraino joango da. Bertan sardina erretzen ikusiko dugu eta inauterien amaiera izango da.

Herriaren parte-hartzearekin eta gure omenaldi sentikorraren bitartez benetan BUGen eta berak jasotako sari ospetsuaren neurrira egotea bihotz bihotzez desiatzen ari gara.