Irailaren 11an izanen da epaiketa eta EHEk elkarretaratzea eginen du Iruñeko Auzitegiaren parean. Auzipetuek euskaraz baizik ez dute deklaratuko eta ez dute itzultzailerik onartuko.
Itziar Claver Herrera eta Haizea Ramirez de Alda Pozueta Altsasuko (Nafarroa) EHEko kideak epaitu eginen dituzte irailaren 11an “Ezabatu eta euskaraz bizi” ekimenean parte hartzeagatik. Auzipetuek euskaraz bizitzeko hautuari eutsiko diote Auzitegian eta euskaraz baizik ez dute deklaratuko. Epailea euskalduna ez bada, ez dute itzultzailerik onartuko. “Ez zaigu batere normala iruditzen gure herrian itzultzailerik behar izatea”, azaldu dute. Epaiketa hasi aurretik elkarretaratzea eginen du EHEk 10:00etan Iruñeko Auzitegiaren parean. Auziperatuei babesa eskaini nahi dutenei bertaratzeko deia luzatu die Ramirez de Aldak.
Joan den urtean “Ezabatu eta euskaraz bizi” ekimenean parte hartu zuten Claverrek eta Ramirez de Aldak. Foruzainekin topo egin zuten eta bi isun jaso zituzten. 6.000 euroko isuna gaztelaniaz ziren seinaleak ezabatzea leporaturik, eta 300 euroko isuna poliziei euskaraz zuzentzeagatik. Bigarren isuna bertan behera utzi zuten, baina lehenbizikoa ordaindu egin behar izan zuten.
Bide administratiboarekin aski ez, eta heldu den asteartean epailearen aurretik pasatu beharko dute Altsasuko kideek. Beraz, bide penala ere jorratuko du auziak. Dena den ez diete deliturik leporatzen, falta baizik. Auziperatuek bizi duten egoera azaldu zuten abuztuan helarazitako iritzi artikulu honetan.
Iragan larunbatean, ekainaren 16an, Euskaraz Bizi Eguna ospatu zuten Uribarrin. Goizean auzoko ‘Euskaldunon I. Asanblada’ egin zuten 20 bat lagunek, Uribarriko plazaren erdian. Bertan bi lan talde osatu zituzten “arlo ezberdinen inguruan aritzeko, hala nola, auzoan euskaraz bizitzeko zailtasunak eta aukerak, euskaraz sorturiko agenda kulturala, euskaldunon sarea eta topagune fisikoa”, esaterako.
Uribarriko euskaltzaleek diotenez, “ideia polit eta probetxugarriak atera ziren bertatik”, laster auzokideei esker forma eta edukia hartuko dutenak.
Ondoren, poteoa egin zuten auzotik triki eta panderoarekin lagunduta, “ Euskal Herriko tradizio zaharrak markatzen duen gisara”. Eguraldiak txarrera egin zuenez muntaia guztia toki estali batera aldatu behar izan zuten baina oso pozik agertu dira ekimenak auzoan izandako harrerarekin. Izan ere, 60 lagun inguru bildu ziren bazkarian eta “tripa bapo bete ondoren” goizeko asanbladatik ateratako ideia nagusiekin murala margotzeari ekin zioten.
Arratsalde partean jende gehiago hurbildu zen Euskara Egunera, eta eguna “giro ezin hobean bukatzeko” Castañoseko “Let hotsak” erromeriarekin kantuan eta dantzan aritu ziren.
Guardia Zibilaren jazarpena
Antolatzaileek salatu dutenez, ospakizunaren bezperan furgonetan batekin prestaketa lanetan ziharduten lagunak gelditu eta identifikarazi zituen Guardia Zibilak. Halere, “izorratzeko saiakera, saiakera hutsean geratu zen” muntaiarekin amaitu eta berehala “Euskaldunon lehenengo asanblada” egin baitzuten.
