Hau Pittu Hau – Euskaldunon konpartsa

Iturria: Bilboko Branka

Iñaki Azkuna alkateak joan den igandean El Correo español egunkariari eskainitako elkarrizketa batean Karola Gunearen inguruan esandakoak gezurtatu dituzte Bilboko Konpartsek. Kazetariak Karola Guneak Aste Nagusian izandako porrotaz galdetzean tokia aukeratzeko unean Jai Batzorde Mistoko gainerako taldeek aurkako iritzirik plazaratu ez zutela dio Azkunak.

Errealitatea, baina, oso bestelakoa da eta hemerotekak agerian uzten du alkatearen eta jaietako zuzendaritzaren artean dagoen koordinazio eza. Maiz ez dagokion tokian sartzea leporatu izan diote Azkunari konpartsek eta azken polemika hau horren adibide garbia dugu.

Bai Bilboko Konpartsek zein Jai Batzorde Mistoan dauden oposizioko taldeek, Bildu esaterako, Karola Gunea kontzertuak egiteko toki egokia ez zela adierazi zuten artean jaiak hasteko bi hilabete falta zirela.

Ekainaren 27an konpartsek gogor kritikatu zituzten kontzertuen eta txiki gunearen kokapen berriak eta uztailaren 9an, berriz ere alkatearen adierazpenei erantzunez, kontzertuak eta txiki gunea beste toki aproposago batzuetan egiteko proposamenak helarazi zizkiola gogorarazi zioten. Bilduk, bere aldetik, Jai Batzorde Mistoaren lana errespetatzeko eskatu zion alkateari.

El Correoren elkarrizketan gainera, hemendik aurrera kontzertuen kokagune berria aukeratu aurretik beharrezkoak diren segurtasun txosten guztiak eskatuko dituela dio Azkunak, Karola Gunea hautatzean halakorik egin izan ez balu bezala. Hala ere, Bilboko Konpartsek afera erabat argitu nahi izan dute eta Karola Gunearen mugak eta segurtasun ezak agerian uzten dituen dokumentua -udal talde guztiek jaso zutena- zabaldu nahi izan du.

Horregatik guztiagatik, konpartsek diote kontzertuekin jazotakoa “ez zela gertatuko Jai Batzorde Mistoari bere lana egiten utzi izan baliote” eta udal gobernuaren erabakiaren atzean arazo teknikoak daudela esatea “pilotak kanpora botatzea” dela uste dute, “ardurak onartu beharrean”.

Azkenik, Bilboko Konpartsek aipatutako bi puntuen inguruan iritzia agertzera deitu dituzte oposizioko udal taldeak “argi geldi dadin bakoitzaren ardura non kokatzen den”.

Argazkian, Bilboko Konpartsek ekainaren 27an eman zuten kontzertu eta txikigunearen inguruko prentsaurrekoa.

Ekainaren 28an, Iñaki Azkuna Udal Erregea, Bilboko hiribilduaren Alkatea garai honetan, 2009. urteko Aste Nagusiko pregoilari minak zuzendutako telebista saio batean elkarrizketatua izan zen.

Aipatutako elkarrizketan, Udal Erregea nabari haserre agertu zen, Bilboko Konpartsetako kideek, Txikigune eta Kontzertuen inguruko kokapenari buruz, egun batzuk lehenago egindako adierazpenak direla eta.

“Su Alteza Municipal” delakoa – hemendik aurrera SAM – kontzertuei buruz esandakoa gogoratuz: “Hauek Bilboko azkarrenak dira, gutxienez, guztiak ingeniariak eta arkitektoak”. “Hain azkarrak badira, zergatik ez dute alternatibarik eman? Zuk entzun duzu? (elkarrizketatzaileari zuzenduz), zeren eta neuk ez dut ezer entzun. Beste aukerarik ez dagoela argia da, bestela, edozeinek Bilboko mapa bat begiratuz inolako zabalgune librerik ez dagoela ikusiko du, Kobetasera ez ditugulako eramango. Beste kokapen bat egotekotan hortxe jarriko genituzke”.

Txikiguneari buruz, SAMek gehitu zuen: “Txikigunea Doña Casilda parkera eraman izan da ez genekielako kaietako obrak, Aste Nagusirako garaiz amaituko ziren ala ez …” “Gainera, ez dakit ze axola zaien haiei Txikigunea lekuz aldatzea”.

Hondatuta gaude. Guzti hau gaizki ulertu zoritxarreko bat da. Eta gure jarrera behar bezala argitzea espero dugu.

Hasteko, gorritu egin gara SAMek, bere handitasunean, gure jakintasuna eta gure titulazioak Bilbo osoari jakinarazi egin dituenean. Ez dugu gustuko horretaz harrotzea, baina bai, egia da, Konpartsetan ingeniariak, arkitektoak, abokatuak, irakasle eta beste tituludun batzuk ez dira falta, mediku bat baino gehiago ere badugu. Badaude gure artean ere iturginak, soldatzaileak, arotzak, langabetu nahikotxo eta dendari seme-alabaren bat ere bai. Mila esker berorren aitortzagatik.

Bilboko Konpartsek denbora luze daramate kontzertuetarako kokapen bi aukera ezberdinak mahai gaineratzen: Etxebarriako beheko aldea eta Zezen plazatik gertuen dagoen Tren Etorbidearen aldea. Gure zentzutasun eskasetik eta horrela gainetik ikusita, gune hauek kapazitate eta seguritate handiagokoak direlakoan gaude.

Txikigunerentzat ere aukera bi plazaratu genituen, behin eta berriz: Plaza Zirkularra eta Eliptikaren artean Gran Viaren zatia eta Quintana kalea (Gas Plaza zena).

Baina SAMek ez du ezer entzun. Eta ez da izango Konpartsen iritzien gaineko interes faltagatik edo eta entzumen-arazoengatik. Ez. Gure errua izan da, gure erru handia, gure erru osoa.

Konpartson baldartasun pasarte berri batean, ideia guzti hauek leku ezegokian aurkeztu genituen. Gu bezalako ergel batek baino ez zituen aurkeztuko Bilboko Jaiei buruzko proposamenak horrelako lekuan. Nori bururatzen zaio horiek gauzak Bilboko Udaletxeko Jai Batzorde Mistoan! Ba horixe, Bilboko Konpartsei. Ikusten duzu? ez gara hain azkarrak?

Hurrengoan, zuzenean audientzia eskatuko dugu SAM gorenari, (bere 13 urteko agintaldi eredugarrian lehen aldiz gurekin biltzeko prest egongo balitz), eta era horretan, zuzenean gure burutazioak helaraziko dizkiogu eta bide batez, berorrekin argazki batzuk atera eta autografoak eskatu.

Beste aldetik, Txikigunearen lekuz aldatzea asko axola zaigu, konpartsetan, arkitekto eta ingeniaritik aparte, arduragabeko larru-jotzaile asko eduki baditugulako, eta haietariko askok bikote ugaltzaileak izaten dira, eta haien ondorengoek Gargantuaren presentzia ozenki eskatzen dute. Baina interesa ez da gugatik soilik, Bilboko txikien ama, aita, aiton-amona, izeko-osaba eta beste familiarrengatik ere bai arduratuta gaude, jai gunetik gertu egotekotan, ezinbestez txosnetatik pasatzen direla eta zurito bat baino gehiago hartzen amaitzen dute edo eta bokata hiperkalorikoa jaten dutela eta ondorioz Bilbotar ertainaren figura liraina apurtzen da borobilari hurbilduz, honek ekartzen duen villaren irudiaren debaluazioarekin. Arduratsuak izan behar gara, turistek zelatatzen gaituzte eta argazkiak egiten dizkigute …

Ala ere, SAM zein Equipo A (Azkunarena) delakoarekin ondo moldatzeko gure asmoari eutsi egiten diogu.

Kontzertuak eta Txikigunerako gure zentzurik gabeko alternatibei uko egiten diegu, eta berriro ere SAMen geografiko-jai filosofia babestuko dugu, harago joanda eta Txikigunerako Pagasarria eskatuz eta Bilboko aireportua Kontzertuetarako erreklamatuz.

Jakin badakigu SAM eta Equipo A delakoak, haien erabakiak Begoñako Andramariren maitasunezko inspirazioaren pean hartzen dituztela. Begoñako amatxuk bilbotarrontzat egokiena dena belarrira xuxurlatu egiten die, beraz ez gara gu izango gobernatzeko sistema hau zalantzan jarriko dugunok.

Berriro ere SAMeri eskatzen diogu gure baldartasuna barka dezala, eta garen zizareak izanda, bere andrearen oinetara jar gaitzala.

Bilboko Konpartsak

Urte luzeetako konpartseroen burugogorkeria alde batera utzita, errealitateari lekua utzi diogu, eta Ramon de Campoamor poeta handia oroituz, honetaz konturatu gara: gure Bilbo honetan, ezer ez da egia ezta gezurra, dena da begiratzen den kristalaren kolorearen araberakoa.

Honengatik, hain zuzen ere, gure alkate ospetsuak erabiltzen dituen kristalen bitartez begiratzeko ahalegina egingo dugu, berak desio bezala, eta behin betiko, gure artean “ondo moldatzeko”.

Eta katarsi kolektibo hau eta gero Bilboko Konpartsek Udaletxeko Erregistroan sartutako eskaera Bilbo osoari jakinaraziko diegu:

2012ko ASTE NAGUSIAN TXIKIGUNE ETA KONTZERTUEN GUNEEN KOKAPEN ALDAKETARAKO PROPOSAMENA:

Bilboko Konpartsetatik, Udal Gobernu taldeak, guk mirestutako Iñaki Azkuna Jaun Txit Alkateak zuzenduta, pairatzen duen bakardadeagatik arduratuta, eta egunez egun Aste Nagusia erabateko hobezintasuneruntz eramaten gaituzten erabakietan jasotzen duten ulermen eta babes faltagatik arduratuta ere, gugatik hain era eraginkorrean erabaki eta pentsatu egiten duten emakume eta gizon jakintsuez osatutako talde honek zabaldutako bideari eutsiz, bi proposamen zehatz egitea erabaki dugu:

Txikigune:

Azkunaren politikoen Taldeak (hemendik aurrera A Ekipoak) aukeratutako Doña Casilda parkearen gunea, jai gune tradizionaletik abileziaz urrunduta dago, ume zein guraso, aitite-amama eta familia osoarentzat onura izugarriak ekarriz. Proposamen honekin, egun hauetan zehar, Arenaleko guneak izuri egiten dituen txosna eta konpartseroen usain maltzurretatik at gelditu izango dira infanteak, gainera konpartsetatik hain hurbil egonda eta ikustean hortxe herriak izugarri disfrutatzen duela, etorkizunean talde honekin batzea bururatu ahal zaie, Bilbok behar duen glamurra galduz.

Beste aldetik, umeen tutoreek haien egoera fisikoa nabarmenki hobetuko dela ikusiko dute, aurtengo Aste Nagusian jada ez dutelako betiko aitzakia izango: “hemen gaudela, txosnetara pasako gara pare bat pote hartzera eta bokata bat jatera”, honek ekartzen duen alkohola eta kalorien gehitzeari muzin eginez. Parkean, haien bizioa baretzeko iturriko ur txorrota baino ez dute izango, gehienez barkillo goxo bat.

A ekipoaren proposamen honekin ados egonda ere, oraindik hobetu daitekeela uste dugu, honetan sakonduz noski:

Txikigunea Bilboko beste gune berde batetara eramatea proposatzen dugu, aisialdirako azalera handiago batekin, zuhaitz askorekin eta aisia eta ostalaritza azpiegitura nahikorekin: Pagasarri baino leku hobeagorik ez dago.

Pagasarrik Doña Casilda ideia aparta egiten duen guztia dauka baina biderkatuta:

• Jai gunetik oraindik urrunago dago.
• Hortxe txikitxuek haien gaiztakeriekin ez diote inori enbarazurik egingo.
• Hortik ere Iberdrola dorrea ikusten da.
• Eta are hobeagoa dena, proposamen honekin, umeen loditasuna ekiditen lagunduko dugu.

Kontzertuak:

Kontzertuak Itsas-Museora mugitzeko A ekipoak egindako proposamenak ez du inolako babesik jaso Jai Udal Batzorde Mistoan. Hau ez da batere justua, A ekipoak proposatu badu zeozergatik izango da, balio eta argitasun itzela duten pertsonez osatuta baitago.

Ez zaigu bidezkoa iruditzen, jende guztiak orain gune horrek duen kapazitate gutxi edota duen arriskugarritasunarekin gora eta behera ibiltzea.

A taldeak esaten duen jende kopurua sartuko da hortxe, baita gehiago ere, zeren eta krisiari esker, bilbotarrok aurreko urteetan baino askoz argalago gaude. Beraz objektiboak izan gaitezen, eta ez dezagun erabili desfasatutako formulak gune baten kapazitatea neurtzeko. Hau, zentzuduna den edozeinek badaki.

Adibide bat: Madrilgo Colon Plazan, argi gelditu bazen bi milioi arima sartzen zirela, nola ez dira ba 10.000 lagun sartuko Itsas-Museoko zelaigunean? Eta 20.000 ere bai!!

Errekara erorketa posibleei dagokionez, Bilboko hiritar guztiek igeri egiten ondo dakitela jakina da, bestela ikas dezatela, Bilbao Kirolaken ikastaroak daude eta.

Horrenbesteko maltzurkeriari ahoa estaltzeko asmoz, kontzertuak Bilboko Aireportura mugitzea proposatzen dugu.

Bilbotar guztiek dakiten bezala, Txorierria Bilboko hedapen gune naturala da, eta ez du jai programaziotik at gelditzeko diskriminaziorik jasan behar.

Apalki uste dugu aireportuko guneak A ekipoak egindako proposamen bikainari oraindik abantaila batzuk gehitzen dizkiola:

• Jai gunetik askoz urrunago dago.
• Milioika pertsonentzako lekua du.
• Lehen mailako nazioarte mailako taldeen etorrera eta irteera erraztuko du.
• Ebakuaziorako erraztasun asko ditu.
• Berdeguneak.
• Zonaldeko auzokideak jada zaratarekin ohituta daude.

 Zinez espero dugu A ekipoak aurkeztutako proposamenak aztertuko dituela.

Errespetu eta mirespenetik, zuen arreta eskertuz, adeitasunez agurtzen zaituztegu.

Bilboko Konpartsak.