Hau Pittu Hau – Euskaldunon konpartsa

Iturria: Bilboko Branka

Iñaki Azkuna alkateak txosten zigortzailea irekita itxi nahi du Konpartsero Eguna Areatzan egitea debekatu izanaren harira sortutako polemika. Ospakizuna Areatzako goiko aldean egin beharrean, kaian egitera behartu zuen Udalak Bilboko Konpartsak, baina koordinadorak bereari eutsi zion eta pasealekuan, beti egiten duen tokian, egin zuen azkenik.

Giroa ezinhobea izan zen eta goizetik ehunka konpartsero bildu ziren pintxo lehiaketan eta ondoren egin zuten bazkari eta erromerian parte hartzeko. Aurretik, alkatea ‘oporretan’ bidaltzeko abiatu duten kanpainaren berri eman zuten kioskoaren aurrean jarritako ‘hondartzan’.

Udalari jaurtitako erronkak, baina, erantzuna izan zuen berehala Azkunaren ahotik. Espazio Publikoari buruzko ordenantza urratzeagatik txosten zigortzailea irekiko dio Udalak Bilboko Konpartsak-eri. Alkateak berak iragarri zuen funikularraren instalazio berrituen inaugurazioan. “Ez dut istilurik sortu nahi sei batailoi sartuta. Ez naiz tranpa horretan eroriko”, azpimarratu zuen.

Azkunak dio ez duela “probokazioan erori nahi”, konpartsek hartutako jarrerari buruz hitz eginez, baina “legea urratzen duenari, jakina, dagokion txostena irekiko zaio”, argitu zuen. Espazio Publikoari buruzko ordenantzaren arabera zigorra 1.500 eurorainokoa izan daiteke arau hauste larrien kasuan.

Itziar Villafañez konpartsen koordinadoraren bozeramaileak, ordea, ez dio alkateari erantzun nahi izan eta debekua Azkunaren haserrealdi bat baino ez dela izan adierazi du, “munduko alkaterik onenaren sarirako izendatu izanaz trufatu ginelako. Argi dago ez zaiola batere gustatu erabili dugun tonu ironikoa”, esan du.

Villafañezek dioenez, Udalak ez du debekua justifikatu. “Udal ordenantzari esker nahi duena egiteko aukera dauka”, salatu du. Eledunaren esanetan, orain arte, Konpartsero Eguna kolaborazio eta parte hartzearen eredutzat hartzen zuen Udalak berak, “horrek arazorik egongo ez zela bermatzen zigun, ekimena instituzionalizatua baitzegoen”.

Azkunopolis

Konpartsero Egunaren aurreko asteetan ugariak izan dira Azkunak konpartsen aurka esandakoak eta Hain zuzen ere, mespretxuzko adierazpen horiek agerian utzi dute Batzorde Mistoan erabakitzen diren auzien inguruan alkateak duen ezjakintasuna, Bilduk salatu zuenez.

Orain hilabete baino gutxiago Bilboko Konpartsek gogor kritikatu zuten autengo Aste Nagusirako Udalak Txikigunea eta kontzertuak antolatzeko aukeratutako kokapen berria. Azkunaren jarrera inposatzailea dela uste dute konpartsek eta behin baino gehiagotan utzi dute agerian azkenaldi honetan. Kritikarako, baina ironia eta umorea erabili dute. Hain zuzen ere, joan den astean Udaletxe aurrean, Jorge Oteitzaren eskultura kendu eta Azkunaren urrezko eskultura jartzeko proposamena egin zuten, baita hiriari Bilbo izena kendu eta Azkunopolis jartzea.

Nolanahi den ere, ika-miketatik harago, garrantzitsuena larunbateko Konpartsero Egunean mila lagunetik gora bildu zirela egun polita pasatzeko eta Aste Nagusirako hilabete baino gutxiago geratzen dela gogoratzeko.

Argazkia: Bilboko Branka

Berroren Udal Gorentasunak (hemendik aurrera BUG) Iñaki Azkuna Jaunak konpartsero eguna Arenalean ospatzea debekatu egin digu, azken 20 urteetan egin dugun bezalaxe.

BUGek arazo ugari ditu. Lehena, arrazoia eman eta koipetzen ohituta dagoela, horregatik ezin ditu desakordioak jasan, eta kritikak are gutxiago. BUGeri, Konpartsok, Aste Nagusian berak aukeratu duen txikigune eta kontzertuetarako kokapenekin ados ez egoteak mina egin dio, eta gainera publikoki adierazi izanak are mingarriagoa suertatu zaio. Ironia eta txantxa erabiltzeak ere izorratu egin dio.

“Munduko Alkaterik onena” izateko bere hautagaitzari buruz barreak egiteak, zaldi-estatua bat eskatzea eta Bilboren izenaren aldaketa eskatzeak bere onetik atera dio.

BUGek, “txirene”a izateaz harro agertzen bada ere, ez du umore handirik, beraz mindu egin da eta zezen baten pare eraso egiten du.

Konpartsok ez dugu ulertzen zer dela eta Udaletxeak gure kontra egiten dituen eraso eta mespretxu etengabeak jasotzen egon behar garen. Bilboko Konpartsakek 1978 urtetik Bilborengatik lanean dagoen taldea da, jai herrikoien alde, kultura, gastronomia, euskara, hiritar balioengatik.

Aste Nagusia baldin badago Bilboko Konpartsakek sortu izan zuelako da eta urte guzti hauetan bizirik mantendu izan duelako. Bilbon inauteriak baldin baditugu, Bilboko Konpartsakek guztiontzako berreskuratu izan zuelako da. Ehundaka lagun bolondres aritzen gara urte osoan zehar ekimen guzti hauek aurrera ateratzeko, konpartsetan eta Udal Batzorde Mistoan.

Zergatik egon behar dugu beti susmopean? Zergatik etengabe erasotuak, mespretxatuak eta zigortuak izaten gara? Jakin daiteke zer egin diogun BUGeri horrela tratatzeko?

Hiritarron partehartzea edo eta auto-antolaketaz usaintzen duen edozein gauzak BUGeri negala sortarazten dio. Horregatik txisteratik atera du, hiritarroi kalearen erabilpena lapurtzen digun esparru publikoaren erabilpenerako ordenantza, SAM eta bere lagunen jabetza pribatua izango balitz bezala, haien kuerdakoek edo eta ondo ordaintzen dutenek soilik erabili ahal izateko.

Ba ez BUG ez. Pena handiz, baina ez zaitugu ez dugu men egingo

Bilboko Konpartsakek 20 urte hauetan zehar, egun hau leku berean ospatzen daramatzagu, umeentzako ekimenekin, bilbotarren artean eusko labeladun elikagaiak banatzen, jaten, edaten, abesten, barre egiten eta dantzatzen. Inolako arazorik sortu gabe. Guztientzako jaia sortzen, hoberen egiten dakiguna da eta horrela jarraituko dugula. Eta badakizu zergatik ez dugun men egingo? Ezin dugulako.

KALEA GUZTIONA DELAKO.

Aste Nagusirako gero eta gutxiago falta da, baina urtero bezala, Bilboko Konpartsok ohitura daukagu beroketak egiten hasteko. Horretarako Bilboko Areatzan ekitaldi ezberdinak antolatu ohi ditugu. Honela konpartsakideak Aste Nagusiari begira martxan jar daitezen eta Bilboko hiritarrak gurekin egun ederra izatea saiatzen gara.

Aurten ere egun berezia izan zen, Errekaldeko Kukutza Gaztetxeak deitutako Manifestazio Internazionalarekin bat egin baikenuen.

Hemen dituzue egun horretako adibide batzuk! Ah! Eta ongi etorri gure konpartsakide berriari!