Hau Pittu Hau – Euskaldunon konpartsa

Ar Redadeg du izena Bretainian antolatzen duten Korrikaren antzeko lasterketak. AEK-k prestatzen duena erreferentzia moduan hartuz 2008an hasi ziren egiten. Korrika bezala, bi urtez behin egiten dute eta aurtengoa laugarren edizioa da. Maiatzaren 24tik 31ra arituko dira korrika. Morlaix herrian hasi eta Glomel-en bukatuko dute. 1.500 kilometroko bidea egingo dute.

Ipar Euskal Herriko AEK-k autobusak antolatu ditu bukaerako festara joateko. Nahi duenak hilaren 29an joan eta ekainaren 1ean itzultzeko aukera izango du.

Euskaldunak hara joaten diren bezala, iaz bretoiak Baionara etorri ziren Korrika 18ren bukaera-festa ezagutzera eta gozatzera.

Iturria: argia.com

Maiatzaren 3an hasi eta 11ra bitartean luzatuko dira Arangoitiko Euskal Jaiko ekitaldiak. Egitarau betean bada nabarmentzen den bat, auzotarren artean ilusio handia piztu duena: maiatzaren 4an 10:00etatik aurrera egingo den lip dubaren grabaketa. Esne Beltza taldearen “Euskaraz bizi nahi dut” abestiarekin etenik gabeko bideoa grabatuko dute, Egileor plazatik hasita eskolara arteko ibilbidea, hain zuzen ere.

Ikusi bideoa:

https://www.youtube.com/watch?v=lTqEaySTmCA

Bilboko auzoetako Jai Batzordeen Auzotarrok koordinakundeak, hausnarketa baten ondoren eta Udalak, Bilboko auzoekin duen jarrera negatiboa kontuan hartuta, apirilaren 12an eta 13an, Bilboko Arenalean, AUZOEN EGUNA ospatuko du.

Jai honen helburua jai herrikoiak defendatzea eta aldarrikatzea da eta bereziki, Bilboko auzo ezberdinetan egiten diren jai herrikoiak.

Dei egin dugu, Euskal Herriko edozein lekutan jai herrikoien alde lan egiten duen edonori… eta bereziki, zuei gonbidatzen zaituztegu apirilaren 12an eta 13an AUZOEN EGUNERA etortzeko eta gozatzeko.

DEFENDATU BILBOKO AUZOETAKO JAIAK!!

Apirilaren 5erako deitu du aurten Euskal Herrian Euskaraz-ek Euskaraz Bizi eguna. Urtero moduan, euskaldunok euskaraz bizi nahia aldarrikatzeko eguna izango da eta ondo pasatzeko aukera ere izango dugu. Gasteizen izango da oraingoan; bilbotarrok erraz izango dugu, beraz, bertaratzea.

Egitaraua, goizetik hasiko da, Porrotxek 11etan botako duen txupinarekin. Eguerdian herri bazkaria izango dugu eta, arratsaldeko 6etan, Andra Mari Zuritik, nazio manifestazioa abiatuko da. Egun osoan izango da kale animazioa eta, arratsaldeko 8etatik aurrera, kontzertuak ere egongo dira.

Aldarrikapena eta jaia uztartzeko aukera bikaina dugu euskaltzaleok, beraz, apirilaren 5erako. Eta hor ikusiko gaituzu Hau Pittu Hau konpartsako hainbat kide ere, betiko moduan, euskaraz biziz.

Apirilaren 5ean Gasteizen elkar ikusiko dugulakoan, ondo segi eta… bizi euskaraz!!

Jardunaldiok martxoaren 19an eta 20an egingo dira, La Bolsa jauregian, 19:00etan hasita.  Lehenengo egunean Dabid Anautek egingo du berba. Anaut ‘Euskararen kate hautsiak. Hizkuntza zapalkuntzaren memoria’ liburuaren egilea da eta berau aurkeztuko du. Sarrera gisa Kontseiluko idazkari nagusia den Paul Bilbaok hitz egingo du.

Bigarren egunean, ostera, ‘hizkuntza zapalkuntza eta erresistentzia Bilbon eta Bizkaian’  jorratuko da. Hizlari Maria Angeles Garai, Bilboko gerra osteko lehenengo andereñoa, Iñaki Gaminde, EHUko irakaslea, eta Xabier Amuriza bertsolari eta idazlea arituko dira.

Hitzaldi guztiak euskaraz izango dira.

Euskararen kate hautsiak

Euskal Memoriak abenduan kaleratu zuen ‘Euskararen kate hautsiak. Hizkuntza zapalkuntzaren memoria’ liburua. Bertan, fundazioak datuak eta testigantzak batu ditu, ugari, Euskal Herriko zazpi herrialdeetakoak. Elkarteak jakinarazi duenez, “1866an euskal herritar guztietatik erdiak baino gehiago euskaldunak ziren. 1996an, 130 urte geroago, %27,6”. Gainbehera hori ez zen prozesu naturala izan, “hizkuntza zaharra mundu modernoaren beharretara egokitu ezina. Alderantziz, euskararen eta herritarren hizkuntza eskubideen kontrako eraso bortitzaren emaitza da”.

Euskal Memoriak nabarmendu duenez, “eraso horrek hamaika aurpegi eduki ditu: debekuak, isunak, mespretxua… Une batez euskararen katea hautsi zen. Kalte handia eragin zuen zapalkuntzak, euskararen etorkizuna kinka larrian paratu arte”. Baina ez zuen eta ez du helburua lortu. !Hizkuntzaren aldeko mugimendua eta kontzientzia iratzarri zen eta, oztopoak oztopo, euskarak bizirik dirau” gogoratu dute antolatzaileek.

Iturria: uriola.info

Ostegunetik Bilbo Inauterietan murgilduta dago, eta larunbatean izan da desfilea. Aurten bai… Kale Nagusitik! alkatearen mehatxuak mehatxu.

Euria eta euria egin duen arren, goizean goizetik konpartsakideok egoitzan batuz joan gara, mozorroei azken ukituak emateko. Giro ederrean, 20 bat lagunek bazkaldu dugu, geure “txef”-ek prestatutako entsalada eta patatak makailuarekin. Eta azkenik arratsaldeko 6etan Kale Nagusian batu gara, euripean.

Eguraldi kaxkarrari aurre egin diogu konpartsakideok, Gadget inspektorez mozorrotuta. Geure aurtengo leloa “Edonon, edonoiz, edonorekin… geure tresna, euskara!” zabalduz eta praktikan jarriz, gadgetoeuskaraz “armatu” gara konpartsakideok.

Inauterietan eta urte osoan, geure jaiak eta Bilbo euskalduntzeko tresna euskara dugu, erabili dezagun! Geu euskaraz bizi gara… eta zu?

Urtero bezala, aurten ere Hau Pittu Hau konpartsako kideok Inauterietako ekitaldietan parte hartuko dugu. Egitaraua planez gainezka dator eta aspertzeko astirik ez dugu izango datozen egunotan.

Inauteriei hasiera emateko, ostegunean Farolin eta Zaranbolas-en epaiketa eta Trapu Zaharren kalejira izango dugu Zazpi Kaleetatik. Ostiralean, berriz, Bilbo Kantarin parte hartuko dugu; izan ere, hilabete honetan data aldatu egin da, Inauterietako egitarauaren barruan sartzeko.

Baina Inauterietako ekitaldirik ezagunena, desfilea dugu. Larunbatean izango da eta, aurten, berezia izango da.  Hamar urteren ostean, azkenean Bilboko Konpartsok Inauterietako desfilerako dagokigun lekua, Kale Nagusia, berreskuratu dugu.  Inauterietako desfile herrikoi eta parte hartzailea, bilbotar guztiona, herritarrok osatutako 50 taldeko baino gehiagok parte hartzen duen desfilea, azkenean Kale Nagusira bueltatzea lortu dugu.

Igandean, indaba lehiaketa eta Zuberoako maskarada izango ditugu Zazpi Kaleetan, eta Inauteriak amaitzeko, sardinaren erreketa izango da asteartean.

Konpartsakideok bagabiltza, azken asteotan, Inauterietako mozorroak  prestatzen, desfilerako koreografia entsaiatzen, prestaketetan murgilduta, giro onean eta, noski, euskaraz biziz. Jaietan, Inauterietan, zein urte osoan zehar, gu euskaraz bizi gara.

Eta zeuk ere euskaraz bizi nahi baduzu, geure konpartsa zeurea ere bada!  Inauterietan, jaietan, zein urteko sasoi guztietan ere, bizi euskaraz!

Bilboko euskal komunikabideak biltzen dituen Uriola.info plataforma aurkeztuko dute bihar, 19:00etan Bilboko Kafe Antzokian. Mota guztietako gaur-gaurko gaien berri emateko sortu dute Uriola.info: kirola, ekonomia, kultura,politika eta baita udal gaien inguruko informazioa ere. Horrez gain, Bilboko eta inguruko jaien berri ere emango du.

Lanean hasia da, eta, besteak beste, hainbat zerbitzu eskaintzen ditu Uriola.info-k, horien artean: agenda, eguraldia, iragarkiak, zorion agurrak eta eskelak jartzeko aukera emango du. Twitter eta Facebook bitartez ere kasu egin ahal izango zaio Bilboko euskal komunikabideak biltzen dituen plataformari.

Lur Mallea plataformako kideari egindako elkarrizketa BERRIAn, hemen.

Iturria: berria.info

Izquierda-Ezkerra koalizioak bultzatuta, euskaldunon menpekotasunean oinarritutako elkarbizitzaren alde egin zuen Nafarroako Parlamentuak. Ikastetxeetan eredu ezberdinetako ikasleek batera jardutea adostu zuten. Eredu ezberdinetako ikasleen arteko elkarbizitza halabeharrez gazteleraz izango dela iritzita, ekimena egin zuen atzo EHEk neurri honen bultzatzaile izan den koalizioaren egoitzaren atarian. Izquierda-Ezkerrak murgiltzen ereduaren kontra egin duela gaitzetsi eta iruzurra begibistan uzten duen galdera bota zuten: “”Euskaraz dakienaren eta ez dakienaren arteko ‘bizikidetza’ zein hizkuntzatan izango da?”. Euskaldunon menpekotasuna gainditzeko, euskal curriculumaren baitan ikasle euskaldun eleanitzak heziko dituen eskola euskalduna aldarrikatu zuen EHEk.