Saul Curtoren espetxeratzea salatzeko asmoz, 110 lagunek parte hartu dute gaur Bilboko Zorrotza auzoan egindako kalejiran. Frantziako Poliziakorain bi astelehen atxilotu zuen zorrotzarra Puy-Saint Gulmier herrian, Puy-de-Dôme departamentuan, Frantziako Estatuko erdialdean. ETArekin lotura duelakoan atzeman zuten, terrorismoaren aurkako iturriek diotenez. Esan bezala, Saul Zorrotzako bizilaguna da eta 32 urte ditu. Halaber, Bilboko Konpartsen idazkari ohia eta Txinbotarrak konpartsako kidea ere bada. Saul Curto ostegunean sartu zuten kartzelan.
Gaurko kalejiraren bukaeran irakurritako manifestua:
Manifestu hau geure egiten dugun auzoko norbanako , talde zein elkarte guztiok hurrengo hau adierazten dugu:
Frantziar Estatuko indar errepresiboek gure auzokidea Saúl Kurto atxilotu zuten aurreko astelehenean, urriak 22, berriro ere, Euskal Herriak behar eta bilatzen duen konponbide demokratikoaren kontra eginez.
Atxiloketek ez gaituzte gatazkaren konponbidera eramango, izan ere, horrelako erasoek euskal herritarron bake nahia zapuztu egiten dute, nahi eta behar dugun baketik urruntzen gaituztelarik.
Elkarrizketa da bakea erdiesteko bide bakarra. Hori dela eta, gatazkan inplikaturiko bi gobernuek (frantziarrak zein espainiarrak), elkarrizketa prozesuari ekin behar diote, luzamenduetan ibili gabe.
Elkarrizketa da eta izan da beti Saúlen ezaugarri nagusietakoa. Saúl auzo honetako herri mugimenduko kidea da, eta bere ekarpena ezinbestekoa izan da auzoarentzat, ideologia, adin eta ikuspegi desberdinak dituzten pertsonen arteko indar-metaketa bultzatu baitu beti. Saulek auzoan egindako lana arlo askotan antzematen da: musika-taldeetan, gazte mugimenduan, Jai Batzordean, Auzo Elkartean, … eta hain handia eta garrantzitsua izan da bere ekarpena, non aspaldiko partez gure artean izan ez den arren, oraindik ere presente baitago gure artean.
Horregatik guztiagatik, manifestu hau geure egiten dugunok gure elkartasun osoa erakutsi nahi diegu Saúli eta bere senideei.
Gatazka konpondu nahi badugu, guztiok izan behar dugu horren parte aktiboa, mobilizazioa prozesu horren motorra izanik.
Aurreko guztia kontuan elkar ikustea espero dugu, Zorrotzan konponbidea nahi dugulako.
