Kontseiluaren iritziz erabaki hau eraso larria da. Eraso larria da gainera, ez bakarrik hezkuntza sistemarentzat, euskararen normalizazioarentzat baizik. Atzerapauso itzela izango litzateke proposamen hori indarrean jartzea. Orain dela 40-50 urte bizi genuen egoerara bueltatzea suposatuko bailuke, Frankismoaren garaira, alegia, zeinean euskarazko irakaskuntza debekatua zegoen.
Euskararen, galegoaren eta katalanaren aurka hartutako erabakia da PPrena. Izan ere, murgiltze eredua debekatu egingo luke eta bide horretan ikasleei bertako hizkuntzan ikastea eta bertako hizkuntza ikastea debekatuko lieke.
Honek, Hego Euskal Herriak, Galiziak eta Kataluniak hezkuntza arloan dituzten eskumenak urratzeaz gain, Espainiako Estatuak ezarrita duen ofizialtasuna bera urratu egiten du, eta erabat babesgabe uzten du gure hizkuntza komunitatea. Horrekin batera, proposamenak Europako Hizkuntza Gutxituen Itunaren artikulu bat ere zuzen-zuzenean urratzen du (bertako hizkuntzan ikasteko eskubidea jasotzen duena, alegia).
Kontseiluaren ustez maila honetako erasoak neurri bereko erantzuna behar du eta hori aztertzen ari da une honetan, eta horrexegatik eragileekin premiazko bilerak egiteari ekingo dio hurrengo egunotan, erabaki honek izan ditzakeen ondorioak aztertzeko. Halaber, Kataluniako eta Galiziako eragileekin ere harremanetan jarri da Kontseilua, Espainiako Gobernuari interpelazio bateratua egiteko aukerak aztertzeko. Gogoratu nahi dugu, larunbatean bertan aldarrikatu genuela Donostiako kaleetan euskaraz bizi nahi dugula eta zentzu horretan, euskaraz eta euskara ikasi nahi dugula.
Bidenabar, gogoratu nahi dugu, Kontseiluan dauden hezkuntza sektoreko bazkideekin batera, euskarazko hezkuntzarako proposamena egina badugula.
Eusko Jaurlaritza berriari ere mezua helarazi nahi dio Kontseiluak, izan ere, lanean hasi orduko mahai gainean izango du afera hau eta behar den erantzukizunaz joka dezan eskatu nahi dio.
