Iturria: Berria.info
Argazkian, Kaiku kooperatibaren izenean sartutako salaketaren agiria.
Euskal Herria Esnea kooperatibak adierazi duenez Kaiku enpresak jarri du salaketa produktuak euskara hutsean etiketatzeagatik. Kooperatibako ordezkariek prentsaurrekoa eman dute gaur goizean, Bilbon; salaketaren inguruko informazio gehiago emateko. Salaketa Elikagai Kalitaterako Zuzendaritzan jarri dute.
Zuzendaritza horren arabera, Euskal Herria Esnea Sorian (Espainia) ontziratzen denez, 17/2008 legea betez gazteleraz ere etiketatu beharko lukete, nahiz eta soilik Euskal Herrian saldu. Elikagai Kalitaterako Zuzendaritzak zehaztu du lege horren arabera arau-hauste larria litzatekela euskara hutsean etiketatzea, eta 2.001 eta 30.000 euro bitarteko isuna izan dezake. Oraingoz, espediente bat ireki diote kooperatibari.
Horrela dio 17/2008 legeak: “Euskararen erabilera sustatuko da Euskal Autonomia Erkidegoan merkaturatutako nekazaritzako eta elikagaigintzako produktuen identifikazioan”. Espainian ontziratzen dutenez, eta bera, produkzio sare osoa EAEn ez dagoenez, gaztelaniaz jartzera behartuta legoke.
Espainiara, ontziratzera
Joxe Agirreburualde kooperatibako presidenteak atzo esan zuen esnea Euskal Herrikoa dela eta Espainiara soilik ontziratzeko jotzen dutela. Euskal Herrian soilik enpresa batek ontziratzen du esnea, Iparlatek, Urnietan (Gipuzkoa) eta horrek ez zuela euren esnea hartu nahi izan salatu zuen.
Atzo eman zuen kooperatibak salaketaren berri, eta oihartzun handia izan zuen sare sozialetan.
Kaiku, Suitzako Emmiren esku
Uztailaren hasieran, Suitzako Emmi taldea Kaiku Corporacionen akziodun nagusia izatetik enpresa kontrolatzera pasa zen: akzioen %42,8 edukitzetik %66 edukitzera. Akziodun nagusia zen 2009tik, Iparlatek bere akzioak saldu zizkionetik. Akordioa abuztuan jarri da indarrean. Emmi taldea Suitzako esne eta esneki ekoizle nagusia da.
